भांगरभूंय | प्रतिनिधी
गोंयांत रेल्वे मार्गाचें 91 टक्के विद्युतीकरण पुराय
पणजीः गोंयांत 91 टक्के रेल्वे लायनीचे विद्युतीकरण जालां. विद्युतीकरणाचें प्रमाण व्हड आसून लेगीत रेल्वे लायनीच्या विद्युतीकरणांत गोंय हें देशांत निमाणें सुवातेर आसा. प्रकल्प थळार जावपी कायदो आनी सुवेस्थेच्यो घडणुको हें एक कारण विद्युतीकरणा खातीर कळाव जावपा फाटलें कारण रेल्वे मंत्रालयान दिलां.
रेल्वे मंत्रालयान जारी केल्ले आंकडेवारी प्रमाण रेल्वे लायनीच्या विद्युतीकरणाचें काम झुजा पांवड्यार हातांत घेतलां. वर्स 2014 मेरेन 60 वर्सांच्या काळांत 21,801 किमि इतल्या रेल्वे मार्गाचें विद्युतीकरण जाल्लें. पूण वर्स 2014 ते 2025 मगजतीं 46,900 किमि इतल्या रल्वे मार्गाचें विद्युतीकरण पुराय जालां.
देशांतल्या पुराय 30 राज्यांनी रेल्वे लायनीच्या विद्युतीकरणाचें काम हातांत घेतिल्लें. आतां मेरेन 30 मदल्या 25 राज्यांनी हें काम पुराय जालां आनी पांच राज्यांनी अजून काम उरलां. गोंय राज्य विद्युतीकरण करपाच्या 91 टक्के प्रमाणा सयत सगल्यांत निमाणें तिसावे सुवातेर आसा. जाल्यार राजस्थान 99 टक्के, आसाम 98 टक्के, तामीळनाडू 97 टक्के आनी कर्नाटक राज्यांत 97 टक्के विद्युतीकरणाचें काम पुराय जालां.
रेल्वे मार्गाचें विद्युतीकरण विविधी घटकांचेर निबूंन आसा. हातूंत रानां खात्या कडल्यान रानां दाखलो, आडमेळीं हाडपी गजालींचे स्थलांतरण, विवीध अधिकाऱ्यां कडल्यान वैधानीक दाखले, प्रकल्प थळार जावपी कायदो आनी सुवेवस्थेच्यो घडणुको, हवामानचे स्थितीक लागून लागपी वेळ ह्या कारणांक लागून विद्युतीकरणाच्या कामाचेर परिणाम जाता.
गोंय राज्य कोंकण रेल्वे आनी दक्षीण पश्चीम रेल्वे क्षेत्रांत येता. कोंकण रेल्वे हें पेडणें ते काणकोण मेरेन रेल्वे सेवा दिता जाल्यार दक्षीण पश्चीम रेल्वे वास्को ते कुळे मेरेन रेल्वे सेवा दिता. कोंकण रेल्वेचें गोंयांत 100 टक्के विद्युती करण पुराय जालां. जाल्यार दक्षीण पश्चीम रेल्वेच्या विद्युतीकरणाचें 96 टक्के काम पुराय जालां.
मजगतीं, दक्षीण पश्चीम रेल्वे मार्गाचें दोट्टीकरण करपा खातीर वेळसांव, चांदरा खर विरोध जाल्लो. थंयसर थळावे आनी रेल्वे अधिकाऱ्यां मदी संघर्श पेटून कायदो आनी सुवेवस्थेचो प्रस्न तयार जाल्लो. हे विशीं पुलिसांनी थळाव्यांचेर गुन्याव नोंद केल्ले. दोट्टीकरणाच्या कामाक लागून दक्षीण पश्चीम रेल्वेच्या विद्युतीकरणाचें काम आडखळून उरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
