भांगरभूंय | प्रतिनिधी
मडगांव : फट कागदपत्रांच्या आधारार दिल्लींतल्यान गोंयांत मास हाडटाले. कोंकण रेल्वे पुलिसांनी १.५४ लाख रुपयांचें ५१४.५ किलो मास जप्त केलें. तशेंच दुबावीत फयाझ अहमद केनगेवार (३७, दवर्ली) हाका मडगांवां अटक केली.
मेळिल्ले म्हायती प्रमाण, दिल्लींतल्या हजरत निजामुद्दिन रेल्वे स्टेशनांतल्यान मडगांव रेल्वे स्टेशनार पार्सला वरवीं बेकायदो बीफाची येरादारी कोंकण रेल्वे पोलिसांनी उक्ताडार हाडली. मडगांव रेल्वेस्टेशनाचेर पार्सल सेवे वरवीं आयिल्ल्या एका पार्सला खातीर दिल्लीं कागदपत्रां आनी माल हांचे मदीं बदल दिसून आयिल्ल्यान हो प्रकार उक्ताडार आयलो. दिल्लीच्या हजरत निजामुद्दीन रेल्वे स्टेशनाचेर पार्सल सेवेवरवीं माल दितना चुकीची प्रमाणपत्रां आनी सक्षम अधिकार्यां कडल्यान तपासणी केल्ल्याची कसलींच कागदपत्रां दिवंक नाशिल्लीं. गोंयांत विक्रे खातीर हो माल हाडटाले. बिफाचे येरादारी खातीर साठवणुकीची योग्य काळजी घेवंक नाशिल्ली. हो प्रकार मुखार येतांच रेल्वे पुलीस अधीक्षक आनी उपअधीक्षक हांच्या मार्गदर्शनाखाला कोकण रेल्वे पुलीस निरीक्षक सुनील गुडलर, पुलीस उपनिरीक्षक रुझवेल्ट फर्नांडीस, पुलीस कॉन्स्टेबल शेख इर्शाद, मोहम्मद हुसेन हांचे सयत ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
