भांगरभूंय | प्रतिनिधी
रेल्वेन खासगी जमिनीचेर अतिक्रमण केल्ल्याचो विरोधकांचो आरोप
पणजी : कांसावले रेल्वे दोट्टीकरणाच्या कामावेल्यान बोवाळ जावन वातावरण बरेंच तापलें. खासगी जमिनीचेर अतिक्रमण करून रेल्वे दोट्टीकरणाचो करपाचे येत्न सूरू आशिल्ल्याचो आरोप विरोधकांनी करतना कामाक हरकत घेतली.
कांसावले आयज खासगी जमनीचेर मशीनरीन राखणे वणत मोडपाचो प्रकार जालो. ह्या प्रकरणांत पुलीशेंत कागाळ लेगीत नोंद जाल्या. बोवाळ जाले उपरांत दक्षीण गोंयचे खासदार विरियातो फर्नांडीस, प्रदेश कॉंग्रेस अध्यक्ष अमीत पाटकार, गोवा फॉरवर्डचे आमदार विजय सरदेसाय घडणूक थळार पावले. कामगारांक काम बंद करपाची सुचोवणी फुडार्यांनी केली.
लोकांक काळखांत दवरून रेल्वे दोट्टीकरण करपाचे यत्न हातुंतल्यान सिद्द जाता. जमीन संपादीत करचे पयलीं खंयचीच सरकारी यंत्रणां काम करूंक शकनात. ह्या प्रकारा आड आमी आवाज काडटले, अशें प्रदेश कॉंग्रेस अध्यक्ष अमीत पाटकार हांणी सांगलें.
सगळीं कागदपत्रां पळयल्या उपरांत हांवें वेर्णा पुलीस स्टेशनाचेर कागाळ नोंद केल्या. हांव हो विशय संसदेंत मांडटलों अशें दक्षीण गोंयचे खासदार विरियातो फर्नांडीस हांणी सांगलें.
जमीन संपादीत करचे पयलीं खासगी जमिनीचेर अतिक्रमण करून काम सूरू करपी अधिकार्याक निलंबीत करपाची गरज आसा. दोट्टीकरणाच्या कामाक लागून रेल्वे दादागिरी करता, असो आरोप आमदार विजय सरदेसाय हाणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
