भांगरभूंय | प्रतिनिधी
पणजी : प्रस्तावीत रेल्वे दोट्टीकरण पर्यटना खातीर न्हय, कोळसो येरादारी खातीर आसा. हाका लागून गोंयच्या पर्यावरणाचें बरेंच लुकसाण जावपाचें आसा. तशेंच हाचो परिणाम दरेका गोंयकाराचेर जातलो. हाका लागून ह्या प्रकल्पा आड राजकीय विचारसरणी विसरून सगल्यांनी एकठांय येवप गरजेचें आसा अशें आम आदमी पक्षाचे प्रदेशाध्यक्ष अमित पालेकार हांणी सांगलें. मंगळारा पणजे जाल्ले पत्रकार परिशदेंत ते उलयताले. ह्या वेळार संदेश देसाय, ऍड. सुनील लोरान हजर आशिल्ले.
पालेकार हांणी, राज्यांतल्या सरकारान जनतेच्या, पर्यावरणाच्या तोंडाक काळें फासलां. रेल्वे दोट्टीकरणाक लागून प्रदुशण वाडटलें. हाका लागून सुमार २ हजार कुटुंबां विस्थापीत जातलीं. ह्या प्रकल्पाक गोंयच्यान सेगीत विरोध जाला. जनतेन आमकां कोकण रेल्वे पुरो अशें सांगूनय दोट्टीकरण करतात. एमपीटींतले एके कंपनीक चड कोळसो वापरपाक मेळचे खातीर हो हट्ट जावनआसा.
तांणी म्हणलें, हे कंपनीचे वयल्यां कडेन बरे संबंद आसात. हाका लागून राज्य सरकारूय हाचे आड कांयच करपाक शकना वा उलोवंक लेगीत शकना. मुख्यमंत्र्यांनी रेल्वे दोट्टीकरणाचे नेमके फायदे कितें आसात हें सगल्यांक सांगचें. ह्या प्रकल्पा आड जनतेन रस्त्यार देंवप गरजेचें. राज्य सरकारान जनतेक गृहीत धरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
