भांगरभूंय | प्रतिनिधी
नवी दिल्ली, खबरां संस्था: प्रधानमंत्री नरेंद्र मोदी हांच्या अध्यक्षते खाला केंद्रीय मंत्रीमंडळान रेल्वे कर्मचार्यांक एक बरी खबर दिल्या. मोदींच्या मंत्रिमंडळान वट्ट ११ लाखां परस चड रेल्वे कर्मचार्यांक उत्पादकतेचेर आदारून बोनस म्हळ्यार पीएलबी जाहीर केला. कामाचेर आदारीत ७८ दिसांचो पगार बोनस म्हणून दितले. हे खातीर २००० कोटी परस चड निधी दिला.
कोणाक मेळटलो बोनसाचो लाव?
मुखार आयिल्ले म्हायती प्रमाण, २०२३-२०२४ ह्या वर्सा भारतीय रेल्वेची कामगिरी खूब बरी आसली. रेल्वेन १५८८ दशलक्ष टन इतली विक्रमी माल येरादारी केली, जाल्यर सुमार ६.७ अब्ज प्रवासी वाहतूक केली. हेच कामगिरीची दखल घेवन मोदींच्या नेतृत्वा सकयल्या केंद्रीय मंत्रिमंडळान २ ऑक्टोबराक जाल्ले बसकेंत देशभरांतल्या ११ लाख ७२ हजार २४० रेल्वे कर्मचार्यांक पीएलबी दिवपाचो निर्णय घेतलो. कर्मचार्यांनी केल्ल्या बर्या कामाच्या बदलाक ७८ दिसांचो पगार ह्या सगळ्या कर्मचार्यांक दितले. हे खातीर केंद्र सरकारान २०२८ कोटी ५७ लाख रुपयांचा निधी मंजूर केल्या. ट्रेन मॅनेजर (गार्ड), स्टेशन मास्तर, पॉयंट्समन, पर्यवेक्षक, तंत्रज्ञ, तंत्रज्ञ सहाय्यक, ट्रॅक मेंटेनर, मंत्रालयांच्या सेवेंतले कर्मचारी, लोको पायलट वांगडाच एक्स सी कर्मचार्यांक बोनस म्हणून ही रक्कम दितले.
पीएलबी खातीर पात्र आशिल्ल्या रेल्वे कर्मचार्यांक बोनस म्हणून दिवपी ही रक्कम दर वर्सा दुर्गापूजा/दसर्याचे सुटये पयलीं दितात. अंदूंय सुमार ११ लाख ७२ हजारां परस चड रेल्वे कर्मचार्यांक ७८ दिसांच्या पगारा इतली रक्कम पीएलबी म्हणून दितले. बोनस म्हणून दिवपी किंमत १७ हजार ९५१ रुपया इतली आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
