भांगरभूंय | प्रतिनिधी
रेल्वे दोट्टीकरण मार्गाचो घेताले नियाळ
मुरगांव: वेळसांवां रेल्वे अधिकाऱ्यांनी सोमारा परतून एकदां लिपचोरयां दोट्टी रेल्वे मार्गा संबंदीच्या कामाचो नियाळ घेवपाचो केल्लो यत्न वेळसांवकारांनी मोडून काडलो आनी तांकां धांवडावन घालें.
रेल विकास निगम लिमिटेडचे वरिश्ठ अधिकारी आनी कर्मचारी सोमारा वेळसांवां वचून दोट्टी रेल्वे मार्गाच्या कामाचो नकसो काडून नियाळ घेत आशिल्ल्याची सुलूस थळाव्या लोकांक लागतकूच तांणी घडणूक थळार धांव घेतली. तशेंच गोंयचो एकवोटचे वांगडीय थंय आयले.
तांणी रेल्वे अधिकाऱ्यांक खाजगी मालमत्तेंत घुशिल्ल्याची जाप विचारली तेन्ना तांकां जाप दिवंक आयली ना आनी ते चलत रावले. गोंयचो एकवोटच्या वांगड्यांनी आनी थळाव्या लोकांनी तांचो फाटलाग केलो. ह्या वेळार ते मोटारींत बसून धांव मारपाचे तयारेंत आसतनाच लोकांनी गाडी आडावन धरली आनी तांकां धारेर धरले.
रेल्वेच्यो अश्यो गजाली गांवचे लोक खपोवन घेवचे नात अशी शिटकावणी तांकां दिली. हाचे पयलीं खूबशे फावटी रेल्वेच्या कर्मचाऱ्यांनी रातच्या वेळार दोट्टी रेल्वे मार्गाचें काम करपाचो यत्न केल्लो. त्या वेळारूय जागरूक नागरिकांनी तशेंच गोंयचो एकवोट संघटणेन, जे आपल्या पुर्वजांचे जमनीची राखण करतात तशेंच कोळशा आड लढो दितात तांणी रेल्वेचीं अशे तरेचीं कृत्यां फळादीक जावंक दिलीं नात.
मजगतीं, रेल्वेच्या ह्या कृत्या विशीं गोंयचो एकवोट संघटणा आनी थळाव्या लोकांनी निरशेणी उक्तायली. रेल्वेन परतून गांवांत पांय दवरल्यार ताचे रेल्वेक परिणाम भोगचे पडटले अशी शिटकावणी थळाव्यांनी दिली.
कोळसो आनी दोट्टी रेल्वे मार्गाक विरोध करपी गोंयचो एकवोटान वेळसांव पंचायतींत आपले उमेदवार उबे केल्ले, तातूंतल्या सातां मदले पांच जाण जैतिवंत जाले. ते खातीर वेळसांवकारांचो कोळसो येरादारीक आनी दोट्टी रेल्वे मार्गाक विरोध आशिल्ल्याचें स्पश्ट आशिल्ल्याचो दावो गोंयचो एकवोटान केल्लो. ह्या प्रकरणांत जिल्होधिकारी कचेरेन लक्ष घालून संबंदितांचेर कारवाय करची अशी मागणी केली. ह्या प्रकरणांत योग्य कारवाय जाली ना जाल्यार आमी मुखा वेलीं पावलां उबारूं अशी शिटकावणी गोंयचो एकवोटचे ओलंसियो सिमोयश हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
