भांगरभूंय | प्रतिनिधी
भारतीय रेल्वे ही भारतीयांची जिवनवाहिनी म्हणल्यार अतिताय थारची ना. दर दिसा रेल्वेंतल्यान प्रवास करपी प्रवाशांचो
आंकडो कोट्यांनी आसा. फकत एके मुंबयंतल्यान पाऊण कोटी लोक दर दिसा रेल्वेंतल्यान वतात. हाचे वयल्यान देशभरांत कितले प्रवासी रेल्वे मार्गान वतात हाचो फक्त अदमास काडूं येता. तशेंच सगळ्यांत चड प्रवासी आशिल्ल्यान रेल्वेक लागून सरकाराक सगळ्यांत चड येणावळ मेळटा.
प्रवाशी थोड्या अंतराचेर उपनगरांतल्या रेल्वे सेवा आनी लांब अंतराचेर लांब अंतराचेर चलपी रेल्वे सेवांचेर आदारून आसतात. रेल्वेंतल्यान भोंवप हो उण्या पयशांनी मेळपी एक सुखद प्रवास, अणभव. प्रवास कितलोय लांब आसलो तरी प्रवाशाक सिटाचें आरक्षण आशिल्ल्यान गाडयेंत थाकाय, वाज येना. आरक्षण जाले उपरांत प्रवाशाक थाकाय मेळटा. रेल्वे गाडयोय फावश्यो आशिल्ल्यान सगळ्यांक आरक्षण मेळटा, आरक्षण मेळनाशिल्ल्यांक सामान्य डब्यांनी भोंवपाची सवय जाता, पूण कोरोना देशांत आयलो आनी हें सगळें चित्र बदललें. कोरोनाक लागून लॉकडावन आनी लांब अंतराच्यो रेल्वे गाडयो बंद पडल्यो. पूण लॉकडावन काडल्या उपरांत हें चित्र बदललें.
रेल्वे प्रशासनान कांय लांब अंतराचे एक्सप्रेस रेल्वेचे मार्ग बदलून कांय एक्सप्रेस गाडयो रद्द केल्यो. आतां रेल्वे प्रशासनान लांब अंतराचे एक्सप्रेस रेल्वेच्या डब्यांच्या आराखड्यांत बदल करपाचो निर्णय घेतला. ह्या धोरणा प्रमाण आतां मेल, एक्सप्रेस, सुपरफास्ट एक्सप्रेसांतल्यान जनरल कोच पुरायपणान काडून उडयतले. देखून येवपी काळांत फकत ह्याच गाडयांनी एसी डबे आसतले. रेल्वे म्हामंडळान हें सुरूय केलां आनी जायत्या एक्सप्रेस गाडयांचे स्लीपर डबे उणे केल्यात. कांय गाडयांचे सामान्य डबे बंद केल्यात.
रेल्वेन स्लीपर डबे उणे केल्ल्यान सामान्य प्रवाशांनी प्रवास करतना अडचणी येतात. पयलीं एका गाडयेंत 12 स्लीपर डबे आनी चार जनरल डबे आशिल्ले, आतां हो आंकडो 5 ते 7 मेरेन देंवला, जाका लागून गरीब आनी सामान्य प्रवाशांच्या बोल्साक खार पडपाक लागला. स्लीपर कोच काडून ताचे बदला एसी कोच वाडयिल्ल्यान आतां स्लीपर कोचाचें आरक्षण मेळना, देखून प्रवाशांनी एसी दुसऱ्या वर्गाची तिकेट घेवची पडटा, जी सामान्य तिकेटीच्या पांच पटींनी चड आसता, देखून… सामान्य प्रवाशांक अर्थीक त्रास सोंसचे पडटात. जनरल डबे उणें केल्ल्यान थंय पांय दवरपाक सुवात आसना. डब्यांची रचना बदलतना रेल्वेन सामान्य, गरीब प्रवाशांचो विचार केलो ना. सगल्या प्रवाशांक एसी डब्यांची तिकीट बुक करप शक्य ना, देखून रेल्वेन तांच्या प्रवासाचेर हावळ हाडल्या. गरीब तशेंच सामान्य प्रवाशांनी रेल्वेंतल्यान प्रवास करचो न्हय अशेंच हें धोरण आसा.
रेल्वेन हें नवें धोरण बदलून गरीब आनी सामान्य प्रवाशांक थाकाय मेळची म्हणून स्लीपर आनी जनरल डब्यांची रचणूक पयलीं सारकी दवरची. रेल्वेन हें नवें धोरण बदललें ना जाल्यार फुडाराक रेल्वेक प्रवाशांची खूब तिडक सोंसची पडटली आनी हाचो येणावळीचेरुय परिणाम जातलो.
चीनान परत काडली कळ
जी-20 शिखर सभेंत चीनान आपलो नवो नकासो जाहीर केलो. इंटरनॅटाचेर उजवाडाक आयिल्ल्या ह्या नव्या नकाशांत भारताच्या लद्दाख आनी चीनांतल्या अरुणाचल प्रदेशांतले कांय गांव दाखयल्ले आसात, इतलेच न्हय, तर गांवांक चीनी नांवां दिली. चीनाच्या ह्या अतिशाणपणाची भारतान रोखडीच दखल घेतली आनी ताचो निशेध केलो. अर्थांत, निशेधा उपरांत चीनान आपली मस्ती थांबयली ना, ती अजूनय चालू आसा. आतां लेगीत चीनान भारताची परतून कळ काडल्या. चीनान अरुणाचल प्रदेशांतल्या 30 वेगवेगळ्या सुवातींक चीनी भाशेंत नवी नांवां दिल्यांत. चीनान अरुणाचल प्रदेशाक झांगनान अशें नांव दिलां.
चीन दक्षिण तिबेटाचो एक भाग असो दावो करता. सतत कितें ना कितें करून भारता वांगडा वाद घालप ही चीनाची पोरणी खोड. फकत भारताचेरच न्हय तर हेर देशांचेय वाटेक चीन वता. अर्थांत ताका आमचो भारत भीक घालीना, ही वेगळी गजाल. चीनान हें केलें तेन्ना भारतान चीनाचो जाहीर निशेध केला आनी आंतरराष्ट्रीय समुदाया कडेन कागाळ केल्या. चीनाच्या दुराचाराक भारत जाप दिवपाक सक्षम आसलो तरी आशियांतल्या हेर देशांक हें तोंड धांपून सोंसचें पडटा. कारण आशियांतल्या कांय देशांक, खास करून भारताच्या शेजाऱ्या देशांक अब्जांनी रुपया रीण दिवन आनी कांय देशांक भंय दाखोवन चीनान ओगी केल्यात. पूण भारत हे युक्तीक बळी पडना, देखून तो वेळोवेळ अशी कळ काडटा.
भारताच्या अरुणाचल प्रदेश आनी लद्दाखाचेर चीनाचो दोळोच ना, अरुणाचल प्रदेश हो आपलोच प्रदेश असो चीनान खूबदां दावो केला. कांय म्हयन्यां आदीं चीनांतल्या झाओझांग शारांत जाल्ल्या खेळांत भारतान खेळपाक न्हयकार दिलो तेन्ना चीनान अरुणाचल प्रदेशांतल्या खेळगड्यांक स्टेपल व्हिसा दिल्ले. स्टेपल व्हिसा दिवन तांणी एके तरेन भारताचे शेंपडेर पांय दवरिल्लो. ताचे आदीं चीनी सैन्य लद्दाखांत पावलें तेन्ना दोनूय देशांचीं सैन्यां एकामेकांक तोंड दिवन खंयच्याय वेळार झूज सुरू जातलें अशी परिस्थिती निर्माण जाल्ली. उपरांत चीनी सैन्यान भारतीय प्रदेश सोडलो. पूण शिमेचेर तांची हालचाल चालूच आसा. मुळांतूच चीन हो संवसारांतलो सगळ्यांत विश्वासघातकी देश. चीनाक संवसारांतली एक महाशक्त जावपाची इत्सा आसा, देखून ताणें विस्तारवादी भुमिका आपणायल्या, हाका लागून तो शेजारच्या देशांची जमीन आनी मालमत्ता हडपता.
चीनाक खबर आसा की कोणूय तांचें विस्तारवादी धोरण आडावपाचो आसत जाल्यार तो भारत, देखूनच ते भारताचेर अशे केन्ना केन्नाय कळ काडून भारताक त्रास दितात, पूण भारत हाका बळी पडचो ना. कारण आयचो भारत हो 1962 वर्साचो भारत न्हय तर 2023 वर्साचो भारत. चीनाक तोंड दिवपाचें धाडस भारतांत आसा, देखूनच चीनान भारता कडेन थेट संबंद दवरनासतना फकत कळी काडून त्रास दिवपाचें धोरण आपणायलां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
