भांगरभूंय | प्रतिनिधी
मडगांव: पाटणा- वास्को रेल्वेंतल्यान 31 प्रवाशांनी अलार्म चेन ओडून गाडी थांबयली आनी गाडयेंतल्यान देंवले. रेल्वे सुरक्षा दळान दुबावितांक अटक केली. न्यायालयान मुखेल दुबाविताक 1100 रुपया आनी हेरांक 600 रुपयांचो दंड दिलो. दंड भरलो ना जाल्यार तीन दिसांची कोठी दिल्या.
मेळिल्ले म्हायती प्रमाण 12742 क्रमांकाच्या पाटणा ते वास्को एक्सप्रेस ह्या रेल्वेंतल्यान प्रवास करपी प्रवाशांनी 1 डिसेंबर दिसा मडगांव ते थिवी ह्या मार्गा मजगतीं करमळी कुशीक अनधिकृत पद्दतीन अलार्म चेन ओडून गाडी थांबयली आनी गाडयेंतल्यान देंवले.
रेल्वे सुरक्षा दळाचे 15 अधिकारी आनी कर्मचाऱ्यांच्या पंगडान रेल्वेची चेन ओडून बेकायदो गाडी थांबयतल्या मुखेल दुबाविता सयत 31 जाणांक ताब्यांत घेतले. रेल्वे कायद्याच्या कलम 141, 145 आनी 147 खाला केल्ल्या गुन्यांवा खातीर अटक करून मडगांव पयलो वर्ग न्यायालया मुखार हजर केले.
न्यायालयान मुखेल दुबाविताक 1100 रुपया आनी उरिल्ल्या दुबावितांक 600 रुपयांचो दंड दिलो. तशेंच दंड भरलो ना जाल्यार तीन दिसांची साद्या बंदखणीची ख्यास्त दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
