भांगरभूंय | प्रतिनिधी
३१२८० चौमी सुवात गुंतवणूक वाठार घोशीत
पणजी : रेयश मागूश पंचायत वाठारांत ३१२८० चौमी जमीनीचेर स्पार्क हेल्थलायन प्रायव्हेट लिमिटेडचे पांच नकेत्री (फायव्ह स्टार) आनी चार नकेत्री (फोर स्टार) हॉटेल जावपाचो मार्ग मेकळो जाला. आयपीबीन मान्यताय दिले उपरांत ही जमीन गुंतवणूक वाठार म्हूण जाहीर जाल्या. हे विशीची अधिसूचोवणी जारी जाल्या.
गुंतवणूक उर्बा मंडळान (आयपीबी) रेयश मागूश हांगा ३१२८० चौमी जाग्याचेर पांच नकेत्री आनी चार नकेत्री हॉटेलांक मान्यताय दिल्या. स्पार्क हेल्थलायन प्रायव्हेट लिमिटेड कंपनी पांच नकेत्री तशेंच चार नकेत्री हॉटेलांची उबारणी करतली. रेयश मागूश पंचायत वाठारांत सर्व्हे नंबर ९५/१ – ए मदीं पांच नकेत्री हॉटेल प्रकल्प जातलो.
आयपीबीच्या नेमाप्रमाण घरपट्टी तशेंच हेर शुल्क घेवपाचे अधिकार आतां आयपीबीच्या मुखेल कार्यकारी अधिकार्याक (सीईओ) आसतले. तशेंच आतां आयपीबी कायद्या प्रमाण ह्या प्रकल्पा खातीर इमारती उबारपाचे परवाने तशेंच शुल्काचे अधिकार पंचायतीक आसचे ना. सगळे अधिकार आयपीबी कायद्याखाला सीईओक आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
