भांगरभूंय | प्रतिनिधी
पोर्तो ः भारतीय पॉप संगीतांतले म्हान गायक रेमो फर्नांडीस हांणी भलायकी इबाडिल्ल्यान युके-गोंय महोत्सवांतल्यो कार्यावळी रद्द केल्यात. एका भावनीक फेसबूक पोस्टांत तांणी, ‘आपल्या मेंदूवा भितर रक्तस्राव जाल्ल्यान फाल्यां १६ जुलयाक आपल्याचेर बुर होल ब्रेन सर्जरी (Burr Hole Brain Surgery) जातली’ अशें सांगलां.
हे बातमेन तांच्या चाहत्यांक, विशेश म्हणल्यार युकेच्या गोंयच्या लोकांक धक्को बसला. लंडनाक ३ ऑगस्टाक जावपी तांच्या पयल्याच खास कॉन्सर्टाची सगले जाण वाट पळयताले. पुर्तुगालांतल्या पोर्तो हांगा रावपी रेमो, स्पेनच्या वलादोलिड साहित्य महोत्सवांत भाग घेतिल्ले कडेन हॉटेलांत पडिल्ल्यान तांकां ही भलायकी समस्या निर्माण जाली. सुरवातेक कांयच दिसूंक ना, मात उपरांत तकली दुखपाक लागली आनी तोल वचपाचीं लक्षणां दिसपाक लागलीं.
हालींच केल्ल्या एमआरआय स्कॅनांत तांच्या मेंदवांत वाडत वचपी सबड्युरल हेमेटोमा आशिल्ल्याचें समजलें. पुर्तुगालाचे नामनेचे न्युरोसर्जन डॉ. ऑस्कर आल्वास हांणी बेगोबेग शस्त्रक्रियेचो सल्लो दिलो.
रेमो फर्नांडीस हांच्या पोस्टा उपरांत संवसारभरच्या तांच्या चाहत्यांनी मॅसेज, कमेंटां वरवीं तांकां खूब मोग, परबीं आनी मागण्यो धाडल्यात. ही शस्रक्रिया आधुनिक पद्दतीन जाता. ताका लागून चड दीस हाॅस्पिटलांत रावपाची गरज पडना, दुयेंतीय बेगीन बरो जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
