भांगरभूंय | प्रतिनिधी
वेर्ला काणका अपघात
म्हापशें: वेर्ला दोन वर्सा पिरायेचे चलयेक डोस दिवन घरा परतुपी जोडप्याचे दुचाकीक रेन्ट अ कॅब जिपीन विरोधी दिशेन येवन धपको दिलो. ह्या अपघातांत ब्रिटोवाडो हांगासरलें हें जोडपें गंभीर जखमी जालें. तांचेर गोमॅकाँत उपचार सुरू आसात. जाल्यार ह्या अपघातांतल्यान तें ल्हान चली कसलीच दुखापत जायनासतना सुदैवान वाटावलें.
हो अपघात शुक्रारा सकाळीं 9.30 वरांच्या सुमाराक वेर्ला काणका पंचायत घरा कुशीक जालो. ह्या प्रकरणांत म्हापशें पुलिसांनी जीप चालक मनीश दर्ग (उ. प्रदेश) ह्या पर्यटका आड गुन्यांव नोंद केला. जाल्यार जखमीं मदीं भावेश राजन सावंत आनी गीता भावेश सावंत हांचो आस्पाव आसा.
जखमी घोव-बायल आपले ल्हान चलयेक वेर्ला काणका पंचायत घरा कुशीक उपभलायकी केंद्रांत डोस दिवपा खातीर आयिल्लीं. डोस दिवन ते ब्रिटोवाडो-पर्रा हांगा आपल्या घरा जीए 03 एजे 7786 क्रमांकाचे स्कुटरीन वतालीं. तेन्नाच काणका ते हणजूणचे दिशेन वचपी जीए 03 एएच 5085 क्रमांकाचे रेन्ट अ कॅब जिपीन हे दुचाकीक विरुद्ध दिशेन येवन धपको दिलो.
ह्या अपघातांत सावंत जोडपें गंभीर जखमी जालें. पूण तांचे दोन वर्सां पिरायेचे चलयेक मात कसलीच दुखापत जाली ना. घडणुकेची म्हायती मेळटकच म्हापशें पुलीस घडणूक थळार दाखल जाले. तो मेरेन जखमींक एम्बुलन्सींतल्यान म्हापशें हॉस्पिटलांत दाखल केले. थंय सावन तांकां गोमॅकाँत दाखल केलें. थंय तांचेर उपचार सुरू आसात. अपघाताचो पंचनामो पुलीस हवालदार नंदू कुडासकार हांणी केलो.
मजगतीं, दुबावीत आरोपी मनीश दर्ग हो आपले घरकान्नी सयत गोंयांत पर्यटना खातीर आयिल्लो आनी हणजूण्यां एका व्हिलांत देंविल्लो. पणजे सावन व्हिलाचे दिशेन वतना वाटेर हो अपघात जालो. पुलिसांनी दुबाविताची सोरो पियेल्ल्याची चांचणी केल्या. अहवाल आयले उपरांत पुलीस फुडली कारवाय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
