भांगरभूंय | प्रतिनिधी
पणजीः डिएलएफान रेईश मागूस दोंगुल्लेचेर रद्द केल्ल्या मेगा प्रकल्पाचें नांव बदलून परत नव्यान प्रकल्प चालीक लायला. ह्या नव्या प्रकल्पाक फाटल्या मंगळारा गोंय रिअल इस्टेट नियमन प्राधिकरणाची (रेरा) मान्यताय मेळ्ळ्या. ते भायर नवे मान्यतायेंत ह्या प्रकल्पाचें क्षेत्रफळ २४ हजार चौ. मी. वाडलां, अशी म्हायती रेरान दिल्या.
मांडवी न्हंये देगेर दोंगुल्ल्यांचेर येवपी ‘द बे व्यू’ प्रकल्पाची नोंदणी रद्द करपा खातीर डीएलएफान गोंय रियल इस्टेट नियमन प्राधीकरणा कडेन (रेरा) अर्ज केला. प्रकल्पाचें आराखड्यांत सुदारणा करून नव्यान प्रकल्पाची नोंदणी करपा खातीर पयलीची नोंदणी रद्द करपाक अर्ज केला अशी बातमी ‘भांगरभूंय’न उजवाडाक हाडिल्ली.
४ जुलय २०२५ दिसा डिएलफ हांणी रेरा कडेन आपलो द बे व्यू प्रकल्प फाटीं घेवपा खातीर वा तांची नोंदणी रद्द करपा खातीर अर्ज सादर केल्लो आनी हो प्रकल्प फाटीं घेवपाक वा तांची नोंदणी रद्द करपाक खंयच्याच मनशाक वा कायदेशीर संस्थेक आक्षेप आसल्यार तांणी १५ दिसा भितर आपले आक्षेप सादर करपाक सांगिल्ले. उपरांत १३ आॅगस्ट २०२५ दिसा रेरान ह्या प्रकल्पाची मान्यताय रद्द केली, डीएलएफ हांणी परत तेच सुवातेर नव्या प्रकल्पां खातीर अर्ज करून ह्या नव्या प्रकल्पांक ९ संप्टेबर २०२५ दिसा मान्यताय मेळ्ळी.
रेईस मागूसच्या सर्वे क्रं. ८७/१-अ-१, ८७/१-अ-२ ८७/१-अ-३ आसा ते सुवातेरच हो प्रकल्प नव्यान येता. पयलींच्या प्रकल्पाचें नांव ‘द बे व्यू’ आसलें. ताचे नांव बदलून ‘बे व्यू इस्टेट’ जालंा. पयलींच्या प्रकल्पाचें क्षेत्रफळ १,०६,३४६ चौ. मी इतलें आसलें आनी आतां नव्या प्रकल्पाचें क्षेत्रफळ १,३०,४८५ चौ. मी. मेरेन वाड जावन २४,१३९ इतली आनीक वाड जाल्या. पयलींच्या प्रकल्पाचो खर्च ४४३ कोटी इतलो आशिल्लो तो आतां बरोच वाडून १५३६ कोटी मेरेन पावला, अशी म्हायती रेरान केल्ल्या अर्जांतल्यान मेळ्ळी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
