रेईश मागूशचो वादग्रस्त मेगा प्रकल्प रद्द करपा खातीर डीएलएफचो अर्ज

भांगरभूंय | प्रतिनिधी

पणजीः रेईश मागूशचो वादांत सापडिल्लो प्रस्तावीत मेगा प्रकल्प रद्द करपाचो निर्णय ‘डीएलएफा’ न घेतला. मांडवी न्हंयेदेगेर दोंगुल्ल्यांचेर येवपी ‘द बे व्यू’ प्रकल्पाची नोंदणी रद्द करपा खातीर डीएलएफान गोंय रियल इस्टेट नियमन प्राधिकरणा कडेन (रेरा) अर्ज केला. प्रकल्पांच्या आराखड्यांत सुदारणा करून नव्यान प्रकल्पांची नोंदणी करपा खातीर पयलीची नोंदणी रद्द करपा खातीर अर्ज केला आसुंये, अशी म्हायती रेराच्या वरिश्ठ अधिकाऱ्यान दिली.

रेईश मागूश तांवटे दोंगुल्लेचेर येवपी प्रकल्प फाटले कांय म्हयने वादांत सापडिल्लो. हो प्रकल्प सैमाचो नाश करून दोंगर बेकायदेशीर रितीन कांपतात, हे खातीर ह्या प्रकल्पा आड खूबशीं आंदोलनां जाल्लीं. ह्या आंदोलनां उपरांत शार नियोजन मंत्री विश्वजीत राणे हांणी ह्या प्रकल्पांक दिल्ल्या मंजुरेंचो नव्यान नियाळ घेवपाचें जाहीर केल्लें. फाटल्या स म्हयन्यांत दोंगर कातरपा खातीर कसलीच मान्यताय दिवंक ना आनी ते पयली दिल्ले मान्यतायेच्या आदाराचेर हें काम चल्लां. ह्या प्रकल्पाचेर कारवाय करचे पयली परवानगीची पडताळणी करप गरेजेचें आसा, अशें मंत्र्यान सांगिल्लें.

पूण शुक्रारा गोंय रेरान एक परिपत्रक उजवाडाक हाडून मेसर्स डीएलएफ एक्सक्लुसिव्ह फ्लोर्स प्रा. लि. आनी भामिनी रियल इस्टेट डॅव्हलपर्स लिमिटेड हांणी आपलो द बे व्यू प्रकल्प फाटीं घेवपा खातीर वा तांची नोंदणी रद्द करपा खातीर अर्ज सादर केला. हो रिअल इस्टेट प्रकल्प फाटीं घेवपाक वा तांची नोंदणी रद्द करपाक खंयचेच व्यक्तीक वा कायदेशीर संस्थेक आक्षेप आसल्यार तांणी 15 दिसां भितर आपले आक्षेप सादर करचे, अशी सुचोवणी रेरान केल्या.

हे विशीं उलयतना रेराचे वरिश्ठ अधिकाऱ्यान सांगलें, नियोजन आनी उदरगत प्राधिकरणांत (पीडीए) वा शार नियोजन खात्यांत (टीसीपी) तांणी प्रकल्पाच्या आराखड्यांत बदल करपाचें थारयलां आसत, देखून तांणी पयलीची नोंदणी रद्द करपाक अर्ज केला आसुंये.

ह्या आराखड्यांत बदल केले उपरांत ते सुदारीत आराखडो रेरा कडेन सादर करून परतून ह्या प्रकल्पाची नव्यान नोंदणी करपाक शकतात आनी तांकां तशी मेकळीक आसा, अशी म्हायती अधिकाऱ्यान दिली. रेईश मागूस गांवाच्या तांवटे वाठारांत सर्वे नं. 87/1-A-1 आनी 87/1-A-2 सुवातेंत डीएलएफच्या प्रकल्पाक रेरान 2022 त मान्यताय दिल्ली. हो प्रकल्प 2027 त पुराय जावपाचो आसलो. पूण वाडट्या विरोधाक लागून ह्या प्रकल्पाचे सुवातेर फक्त प्लॉटींग करून दवरिल्ले. 28,474 चौ. मि. सुवातेंत सुमार 443 कोटी रुपया खर्च करून 84 व्हिला ह्या प्रकल्पांत येवपाचे आसले.