भांगरभूंय | प्रतिनिधी
गोयांत 1980 -90 च्या दसकांत व्हड प्रमाणांत घरां बांदताले. ताका लागून चिरे, रेंव, शिमीट, खडी, वारांव, गंवडे, मानाय हांकां खूब मागणी आयिल्ली. उपरांत हो वेवसाय मंद जालो. मात फाटल्या कांय वर्सांनी गोंयांत मेळत थंय व्हडले प्रकल्प उबे रावपाक लागिल्ल्यान बांदकामाच्या सामानाक तेजी आयल्या. रेंव उसपप हिस्पा भायर वाडलां. पर्यावरणाक तें सामकें मारक. न्हंयां देगांचेर रावप्यांक हें सांगपाक नाका. शेतां, बागायती, पोरसां पसून न्हंयांनी गिळ्ळ्यांत. कारण रेंवेंचो आदार गेल्ल्यान धडो कोसळून न्हंयांची रुंदाय वाडल्या. खंयच्याय वेवसायाक मागणी आयली काय तातूंत गैरप्रकार वाडटात. रेवें बाबतींत हेंच जालां. थंय माफिया, गुंड प्रवृत्तीचे वेवसायिकूय घुसल्यात. देखून रेंव उस्पितना हिंसाचार जाता. दोन वर्सां पयलीं एकलो मेल्लो. (बाणसाय, 31 आॅगस्ट 2022). महाराष्ट्रांत तर एका सरकारी अधिकाऱ्याक दनपारच्या कडार पेत्रोल ओतून लाशिल्लो. उगव्यां पयलीं मारामारी, फारपेटाचे जायते प्रकार जाल्यात.
पोरस्कडें- उगवें शिमेर तेरेखोल न्हंयेंत रेंव काडपाक आठ जाणांचो एक पंगड व्हडें घेवन वतालो. इतल्यान गुळयो सुटल्यो. एकल्याच्या मानेंतल्यान तर दुसऱ्याच्या हातांतल्यान एक- एक गुळी गेली. मात्शें वयर- सकयल जाल्लें जाल्यार दोगूय आक्ताक सोंपपाचे. कायदो आनी सुववेस्था सांबाळप्यांचेर आतां चड जापसालदारकी आयल्या. पयर पणजे पुलीस स्टेशना भायरूय दोन टोळक्यांचें पेटिल्लें. कांय आडवाद सोडल्यार चडशे वेवसाय दिसा उजवाडांत करतात. मध्यानरातीं जातात त्यो चोरयो, दरोडे. रेंव काडपाचें काम रातचेंच कित्याक जाता? रेंव काडपाचेर बंदी आशिल्ली. कांय अटीं सयत ती इल्ली सदळ केल्या. ह्या वेवसायांत चडशे गोंयकार आसात, असो दावो करून रेंव काडपा वयली बंदी फाटीं घेवची, अशी मागणी जाताली. दुसरे वटेन रेंव उस्पुपाचें प्रमाण वाडलां अशें थळाव्या गांवकारांनी दोन वर्सां पयलीं सरकाराक निवेदन दिल्लें. सरकार रेंव काडपाचे परवाने थळाव्यांक दिता. दरेका परवान्याचेर वर्साक 1400 चौ. मिटर काडपाक मेळटा खंय. रेंव बुडून काडपाची अट आसा. यंत्र वापरून न्हय. व्हडेंय सादेंच जाय. पावसाच्या दिसांनी रेंव काडपाक मेळना. अर्थांत ह्यो अटी, नेम, बंधना फक्त कागदाचेर आसात.
उगवेंचो फारपेट नेमको कोणे, खंय लिपून आनी कित्याक केलो तें सोदचें पडटलें. आधुनीक रायफल बी वापरल्यार कितें जावपाचें? उण्यां वेळांत, चडांत चड रेंव काडपाची सर्तूच सगले कडेन लागिल्ली जाणवता. रेंव ही तशी सरकारी मालमत्ता. ती राखपी सरकारी अधिकारी, पुलिसांक न्यायालयान कारवायेचे अधिकार दिल्यात. मात, रेंव काडप्यांच्या नाकांत दावें घालपा बदला, तेच तांचे कडल्यान स्वताक आमडून घेवपाक लागल्यात. अशें म्हणप योग्य न्हय. पूण सगलेच तर तशें उघड उलोवपाक लागल्यात. पेडणें म्हालांतल्या वेवसायिकांनी रेंवेंच्यो हद्दी वांटून घेतल्यात खंय. मागीर एकमेकांच्या हद्दींत व्हडें पावल्यार केस्तांवां… उपरांत फारपेट. प्रकरण चड गंभीर आसले बगर पुलीस थंय पावनात, अशें थळाव्यांचें म्हणणें. कालच्या वादाक ही फाटभूंय आसा काय आनीक कितें वेगळें घडलां??
वयर म्हणला तशें, रेंवेंची मागणी वाडल्या. देखून महाराष्ट्रांतल्यान रेंव येता. ती बेकायदेशीर अशें गोंयकार रेंव वेवसायीक म्हणटात. पत्रादेवी नाक्याचेर ट्रकांची तपासणी जायना तर? हो वेवसाय (रेंव उसपप, तपासणी न्हय!) प्रामाणीकपणान जावंक जाय. कामगार खंयचे, तांची फाटभूंय, नांवां, गांव सगली नोंद पुलिसां कडेन आसची. रेंव काडटात, थंय सरकारान ड्रोन, सीसीटीव्ही कॅमेरे, जीपीएसा सारकी यंत्रणा बसोवची, पुलिसांनी गस्त घालची वा थंय बंदोबस्त दवरचो, रेंव काडपाक वेळाचें बंधन सक्तीचें करचें, लोकांक कागाळ करपाक व्हाॅट्सअॅप नंबर दिवचो… पंचायतींनी, गांवच्या समितींनीय आतां हाचेर नियंत्रण दवरपाचो वेळ आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
