भांगरभूंय | प्रतिनिधी
खण खात्या कडल्यान अर्जांच्या तपासणेक सुरवात
पणजी: मांंडवी आनी जुवारी न्हंंयेंत रेंव काडपाच्या परवान्या खातीर 100 अर्ज आयल्यात. ह्या अर्जांची तपासणी सुरू आसा. तपासणे उपरांंत फुडली प्रक्रिया जातली अशी म्हायती खण संंचालक नारायण गाड हांणी दिली.
अर्जांच्या तपासणे उपरांंत पर्यावरणीय दाखलो घेवपाची प्रक्रिया सुरू जातली. बेगिनांत बेगीन सगळे सोपस्कार पुराय करून परवाने दिवपाचे यत्न आसात. जिल्हो सर्वेक्षण अहवालांत (डीएसआर) घाळपणा आशिल्ल्याचे सांंगून राज्य पर्यावरण परिणाम मोलावणी प्राधिकरणान (एसईआयआयए) रेंव काडपाचे पर्यावरणी दाखले (ईसी) दिवपाक न्हयकार दिल्लो. सर्वेक्षण अहवालातलो घाळपणा पयस करून परतून ते सादर करपाची शिफारस पर्यावरण मोलावणी प्राधिकरणान जिल्होधिकारी तशेंच खण खात्याक केल्या. काय वाठारांंचो उत्तर तशेंच दक्षीण जिल्ह्यांत आस्पाव जाला. तो पयस करून परतून ईसी खातीर प्रस्ताव सादर जातलो. हाका चड वेळ लागचो ना, अशें खण संंचालकांंनी सांंगलें.
मांंडवी आनी जुवारी न्हंंयेंत रेंव काडपाक परवाने दिवपा खातीर खण खात्यान ऑक्टोबर सावन अर्ज मागयिल्ले. अर्ज सादर करपाची मुजत सोंपल्या.
राज्य पर्यावरण परिणाम मोलावणी प्राधिकरण (एसईआयआयए) बसका घेवन पर्यावरणी दाखले (ईसी) दिवपा विशीं निर्णय घेता. हालींच प्राधिकरणाचे बसकेंत सर्वेक्षण अहवालाचेर चर्चा जाली. अहवालांत उत्तर गोंंयच्या मांंडवी न्हंंयेचे कांय वाठार आनी गांवांंचो आस्पाव दक्षीण गोंंय जिल्ह्याच्या अहवालांत जाला. ही गजाल दुरुस्त करपाची गरज आसा. फुडाराक हातूंतल्यान नवे वाद तयार जावप शक्य आसा. हो उणाव पयस करपाची सुचोवणी प्राधिकरणान जिल्होधिकारी तशेंच खण खात्याक कळीत केल्या. नव्यान अहवाल सादर जाले उपरांंत पर्यावरणी दाखल्याचो निर्णय जातलो. खण खात्यान सर्वेक्षण अहवालांतलो उणाव पयस करपाची प्रक्रिया सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
