भांगरभूंय | प्रतिनिधी
प्राधिकरणाच्यो कांय अटी खण खात्याक अमान्य
भांगरभूंय । प्रतिनिधी
पणजीः पर्यावरणीय प्रभाव मुल्यांकन प्राधिकरणान रेंव काडपा संबंदांत घातिल्ल्या कठीण अटींक लागून गोंयांत कायदेशीर रेंव काडप लांबणेर पडपाची शक्यताय आसा. प्राधिकरणान घातिल्ल्यो कांय अटी खण खात्याक मान्य नात. पूण प्राधिकरण आपले भुमिकेचेर ठाम आशिल्ल्याची म्हायती खण खात्याच्या सुत्रांनी सोमारा ‘भांगरभूंय’ कडेन उलयतना दिली.
खण खात्यान कायदेशीर रेंव काडपा संबंदांत ज्या न्हंयांतले झोन निश्चीत केल्यात, थंयच्यो सुवातो डिमार्क करच्यो, तशेंच न्हंयांनी कितले खोल मेरेन वचून रेंव काडटात, ताची म्हायती दिवची, अश्यो अटी घातल्यात. ह्यो दोनूय अटी खण खात्याक मान्य नात. न्हंयेच्या उदकांत सुवातो डिमार्क करपाक मेळच्यो नाशिल्ल्यान खात्याच्या अधिकाऱ्यांनी प्राधिकरणाक कळयल्लें लेगीत. पूण ह्यो अटी पुराय जाले उपरांतूच रेंव काडपा खातीर गरजेचे आशिल्ले पर्यावरणीय दाखले दितले, अशें प्राधिकरणान स्पश्ट केल्ल्यान खण खात्याच्या अधिकाऱ्यां मुखार प्रस्नचिन्न उबें रावलां, अशें सुत्रांनी सांगलें.
रेंव काडपा खातीर फोंडें वाठारांत निश्चीत केल्ल्या कांय झोनांचो आस्पाव दक्षीण गोंयांत, जाल्यार कांय उत्तर गोंयांत केल्यात. अशें सांगून कांय दिसां आदीं प्राधिकरणान पर्यावरणीय दखले दिवपाक न्हयकार दिल्लो. झोनाचे जिल्हे निश्चीत करून सर्व्हेक्षण अहवाल नव्यान सादर करपाचे आदेश जिल्होधिकाऱ्यांक दिल्ले. ते प्रमाण सगळ्यो प्रक्रिया पुराय जाल्ल्यो आसतना आतां झोनाच्यो सुवातो डिमार्क करपाच्या विशया वयल्यान आतां दाखले दिवपाक न्हयकार दिला. हाचेर खण खातें कशे तरेन उपाय काडटलें, हें फुडल्या कांय दिसांनी स्पश्ट जातलें. मजगतीं, गोंयांतली रेंव काडपाचें बंद जाल्ल्यान गोंयकारांक हेर राज्यांतल्यान येवपी रेंवेचेर पातयेवन रावचें पडटा. ताका लागून रेंवेचे दर लेगीत वाडल्यात. हाका लागून लोकांक अर्थीक वजें सोंसचें पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
