भांगरभूंय | प्रतिनिधी
पणजी ःगोंयांत बेकायदेशीर रेंव उसपप बंद करपा खातीर अधिकाऱ्यांनी फकत न्यायालया मुखार न्हय तर राज्या कडेनूय आपली जापसालदारकी वळखून काम करचें अशें स्पश्ट निर्देश गोंयच्या मुंबय उच्च न्यायालयान दिल्यात.
राज्यांची मालमत्ता आशिल्लीं रेंव बेकायदेशीर रितीन काडून विकली वा निर्यात केल्यार ताचो परिणाम राज्यांचेर जातलो. कोणूय राज्य सरकाराचो कर्मचारी आसल्यार तांणे राज्याच्या मालमत्तेचे राखण करची अशी अपेक्षा आसता अशें न्यायाधीश भारती डांगरे आनी निवेदिता मेहता हांच्या खंडपिठान निरिक्षण नोंद केलें.
हे फाटभुंयेर खण आनी भूविज्ञान संचालनालयाचे संचालक नारायण गाड हांणी बेकायदेशीर रेंव उसपप, सांठोवप आनी येरादारी आडावपा खातीर तालुका पांवड्यार भरारी पंगड नव्यान स्थापन केलां अशी म्हायती न्यायालयांत दिली. ह्या पंगडांचें फुडारपण उपजिल्लोधिकारी आनी उपविभागीय दंडाधिकारी करतले. तांच्या गैरहाजेरींत मामेलदार वा सहाय्यक मामेलदार कार्यभार सांबाळटले.
भौशीक कागाळी सयत हेर खात्याच्या जिल्लो पांवड्यावेल्या नोडल अधिकाऱ्यां कडल्यान मेळिल्ल्या कागाळींचेर हो पंगड बेगोबेग कारवाय करतलो. आनी स्वेच्छा तपासणीय करतलो. गरज पडल्यार तटरक्षक, पुलीस वा कॅप्टन ऑफ पोर्ट्स हांचे बोटींचो वापर करून उदकामार्गांचेरूय कारवाय करतले. कारवाय जाले उपरांत तीन दिसां भितर जिल्लो पांवड्यावेल्या नोडल अधिकाऱ्यांक अहवाल दिवप सक्तीचें आसा. जिल्लोधिकाऱ्यान नेमिल्लो नोडल अधिकारी फ्लायिंग स्क्वाडाच्या कामकाडाचो नियाळ घेतलो आनी गरजेच्यो सुचोवण्यो दितलो.
मजगतीं, गोंय रिव्हर सँड प्रोटेक्टर्स नेटवर्काचे मिलिंद नायक हांणी दाखल केल्ल्या प्रतिज्ञापत्रांत न्यायालयान दिल्ल्या निर्देशा उपरांत लेगीत बेकायदेशीर रेंव काडप, येरादारी आनी खणकाम चालू आसा असो आरोप केला. तशेंच मयां, मायणा-कुडतरी आनी सांतइस्तेव हांगा चलपी कारवायांचे फोटोय तांणी सादर केले. ह्या प्रकरणांतली फुडली सुनावणी 25 ऑगस्टाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
