भांगरभूंय | प्रतिनिधी
पणजी : राज्यांत सुरू आशिल्ल्या व्हडा प्रमाणां रेंव उसपुपाची गंभीर दखल घेतना उच्च न्यायालयान दिवचल मामलेदारांक नोटीस धाडपाचे निर्देश उत्तर गोंय जिल्लोधिकार्यांक दिल्यात. अवमान याचिकेचेर सुनावणी सुरू आसतना हे निर्देश उच्च न्यायालयान दिले.
राज्यांत रेंव उसपपाचो (मॅन्यूएल) परवानो दिवपाची प्रक्रिया खण खात्या कडल्यान सुरू आसा. कायदेशीर परवानो नासतनाय न्हंयेच्या पात्रांतल्यान बेकायदो आनी बर्याच व्हड प्रमाणांत रेंव कापडाचे प्रकार चालूच आसात. हाचेर नियंत्रण दवरपाक सरकारान उच्च न्यायालयाच्या आदेशा प्रमाण भरारी पंगड स्थापन केल्ले. विर्डी – सांखळेच्या व्हाळवाट न्हंयेच्या पात्रांत रेंव उसपप चालूच आशिल्ल्याचो अहवाल तलाठ्यांनी दिवचल मामलेदारांक दिल्लो. उपरांतूय दिवचल मामलेदारांनी कारवाय करपाचें सोडलें. हो प्रकार सुनावणे वेळार दाखयले उपरांत दिवचल मामलेदारांक नोटीस धाडली. तांचे कडल्यान स्पश्टीकरण मागचें, अशे निर्देश उच्च न्यायालयान उत्तर गोंय जिल्लोधिकार्यांक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
