भांगरभूंय | प्रतिनिधी
वाळपयः महाराष्ट्रांतल्यान गोंयांत रेंवेची बेकायदो येरादारी करपी ट्रकान वाळपय वाठारांत झाडाक धपको दिल्ल्यान व्हड अपघात जालो. चावक बरे भशेन वाटावलो, मात ट्रकाचें व्हड प्रमाणांत लुकसाण जालें.
हो अपघात शुक्रारा फांतोडेर जालो. महाराष्ट्रांतल्यान गोंयांत व्हड प्रमाणांत रेंवेची येरादारी जाता. अशीच येरादारी करपी एक ट्रक शुक्रारा वाळपय दिशेन येतालो. फांतोडेर 5 वरांच्या सुमाराक चालकाचो ट्रका वयलो ताबो गेलो आनी सरळ वचून झाडाक आपटलो.
मेळिल्ले म्हायती प्रमाण, चड करून रातच्या 12 वरां उपरांत आनी सकाळीं 6 वरां आदीं ही रेंवेची बेकायदो येरादारी चड प्रमाणांत जाता. हे संबंदांत थळाव्या रेंव येरादारी करपी वेवसायिकांनी कागाळ करून लेगीत ताचेर पुलीस पुराय तरेन आडनदर करतात. पुलीस आनी बेकायदो येरादारी करपी चालकां मदीं सेटींग आशिल्ल्यान अशे प्रकार घडटात, असो तांणी आरोप केला.
——————-
बॉक्स
पुलिसांचें सेटींगः थळाव्यांचो आरोप पुलीस आनी बेकायदो येरादारी करपी चालकां मदीं सेटींग आशिल्ल्यान अशे प्रकार घडटात, असो आरोप थळाव्या रेंव वेवसायिकांनी केला. महाराष्ट्रांतल्यान जावपी रेंवेची येरादारी पुराय तरेन बेकायदो आसा. ताका कसलीच परवानगी ना. हे संबंदांतली म्हायती आसून लेगीत ताचे कडेन पुलीस आडनदर करतात. म्हत्वाचें म्हणल्यार तळेखोल, रावण, पर्ये ह्या वाठारांतल्यान ही येरादारी जाता. हे येरादारीक विरोध करपा संबंदांतलें निवेदन रावण गांवांतल्यान हे आदीं उपजिल्होधिकाऱ्यांक दिलां, मात ताची अजून मेरेन मातूय दखल घेवंक ना. वाळपय पुलीस स्टेशनार खूब खेपे कागाळ केल्या, पूण ते लेगीत कांयच करिनात. तांणीच रेंवेचे बेकायदो येरादारीक उर्बा दिल्या, असोय आरोप थळाव्या रेंव वेवसायिकांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
