भांगरभूंय | प्रतिनिधी
पणजी : साळ न्हंयेंत रेंवेंच्या पट्ट्यांची समस्या कायम आसा. रेंवेंच्या पट्ट्यांक लागून कुटबण जेटीवेल्यान नुस्तेंमारी करपाक वचपी बोटींचे अपघात जायत आसतात. बिरेस्ताराय नुस्तेंमारी करून येवपी बोटीन रेंवेच्या पट्ट्यांक धपको दिल्ल्यान आडकून उरली. मात, बोटीचेर आशिल्ले नुस्तेंमारी पेंवत दर्यादेगेर पावले.
कांय नुस्तेंमार्यांनी दिल्ले म्हायती प्रमाण, नुस्तेंमारी करून बोट कुटबण जेटीर येताली. तेन्ना रेंवेच्या पट्ट्यांक धपको दिवन ती थंयच आडकली. ह्यान पयलींय अशे तरेच्यो घडणुको घडल्यात. साळ नदीच्या तोंडारूच आशिल्ल्या रेंवेंच्या पट्ट्यांची समस्या सोडोवपा खातीर नुस्तेंमार आनी बोट धनयांनी हे सुवातेर राखणे वणट बांदपाची मागणी केल्ली. मात, पर्यावरण मंजुरी मेळूंक नाशिल्ल्यान हो प्रकल्प आडकून उरला.
सुमार सात वर्सां आदीं, नुस्तें वेवसाय विभागान साळ न्हंयेच्या तोंडार राखणे वणट बांदपाचें काम हातांत घेतिल्लें. मात, राष्ट्रीय हरित लवादा कडेन ह्या प्रकल्पाक आव्हान दिले उपरांत काम स्थगीत दवरलां. हरित लवादान पर्यावरण दाखलो घेवन काम फुडें व्हरपाक सुचयिल्लें. मात तें मुखार सरूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
