भांगरभूंय | प्रतिनिधी
उत्तर गोंय रेंट ए कॅब संघटणेची मागणी
पणजी: येरादारी खात्यान १२ वर्सां परस चड पोरण्या ’रेंट कॅब’ वाहनांचो परवानो नुतनीकरण करप ना असो घेतिल्लो निर्णय बेगोबग फाटीं घेवचो, अशी मागणी उत्तर गोंय रेंट ए कॅब संघटणेन केल्या. ह्या निर्णयाक लागून राज्यांतल्या खुबश्या रेंट अ कॅब वेवसायिकांचो रोजगार काडून घेतले, असो भंय उक्तावन संघटणेन पोरणीं वाहनां बदलपाची मुजतूय वाडोवपाची मागणी केल्या. बिरेस्तारा संघटणेच्या वांगड्यांनी येरादारी खात्याकडेन हे विशीं आक्षेप नोंद केले.
हे विशीं म्हायती दितना मौलाना शेख हांणी, ह्यान पयलीं येरादारी खात्यान १२ वर्सां वयल्या रेंट कॅबांक नूतनीकरण परवानो दिवपाचो निर्णय घेतिल्लो, मात कांय म्हयन्यां आदीं हातूंत बदल केला. नव्या नेमा प्रमाण अशे तरेच्या क्लबांक १२ वर्सां पुराय जालीं काय रेंट कॅबाचो परवानो मेळचो ना. इतलेंच न्हय १२ वर्सां पुराय जावचे पयलींच पोरणी गाडी विकून त्याच परवान्याचेर नवी गाडी घेतल्यार, ती नवी गाडीय पोरणे गाडयेच्या उरिल्ल्या १२ वर्सांच्या काळा खातीर वापरपाक मेळटली. ह्या दोनूय नेमांक लागून रेंट कॅब वेवसायिकांक बरेंच व्हड लुकसाण जातलें अशें तांणी म्हणलें.
संघटणेच्या नांवार रीण काडपाक मेळनाशिल्ल्यान आमी रेंट कॅबचे खरेदी करार व्यक्तिगत स्वरूपांत दिवपाची मागणी केल्ली. हाका २०१८त मान्यताय मेळिल्ली, मात आतां ही प्रक्रिया अवैध थारायल्या.
ह्या सगल्या मुद्यांचेर येरादारी संचालकां वांगडा बिरेस्तारा बसका जातली. हे बसकेंतल्यान तोडगो येवंक ना जाल्यार मुख्यमंत्री कार्यालया कडेन कागाळ दाखल करतले आनी थंयसरूय समाधानी निर्णय जावंक ना जाल्यार न्यायालयाची पायरी चडची पडटली, अशी शिटकावणी शेख हांणी दिली.
ह्या वेळार नितेश चोडणकार हांणीय आपली तिडक उक्तायत म्हणलें, ह्यान पयलीञ आमी सरकारान जारी केल्ले सगले नेम पळ्ळ्यात. मात, नव्या नेमा प्रमाण रेंट कॅबाक १२ वर्सां जालीं काय तें वाहन खाजगी करचें, असोच संदेश खातें दिताा. हाका लागून बेरोजगारी वाडटली. तांणी मुखार म्हणलें, ह्या वेवसायांत एखादी मोठी कंपनी हाडून आमच्या पोटार पांय दवरपाचो सरकाराचो विचार आसूं येता अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
