भांगरभूंय | प्रतिनिधी
विजय सरदेसाय हांचो आरोप
भांगरभूंय । प्रतिनिधी
पणजी : गोंयांत भ्रश्टाचार, घोटाळे वाडल्यात, आतां रेंट कार परवानो दिवपांत नवो घोटाळो उजवाडाक आयलां. नवो परवानो दिवपाक बंदी आसतनाय एका मंत्र्याच्या पीएन परवानो दिवपाच्या निमतान लोकां कडल्यान लाखांनी रुपया घेतल्यात. हो वेव्हार गोंयांतल्या मुखेल शारांतल्या दलालां वरवीं जाला, असो आरोप आमदार विजय सरदेसाय हांणी केलो. शेनवारा पणजे घेतिल्ले पत्रकार परिशदेंत ते उलयताले.
सरदेसाय हांणी सांगलें, सरकारान हालींच नव्या रेंट कारीक परवानो दिवचे नात, अशें स्पश्ट केलां. मात हे आदीं बंदी आसतना लेगीत नवो परवानो दिता म्हूण लोकां कडल्यान दरेकी एकेक लाख रुपया घेतल्यात. ही रकम रोख स्वरुपांत घेतल्या. आमचे म्हायती प्रमाण उण्यांत उण्या 300 लोकां कडल्यान अशे पयशे घेतल्यात. तातूंतले कांय लोक आमी मंत्र्यांक पयशे दिल्यात, अशें सांगतात. मंत्री मात राम मंदिराचेर चित्रपट काडपाच्यो गजाली करतात. हो प्रस्न सुटूंक ना जाल्यार अधिवेशनांत आमी वळेरीच सादर करतले.
गोंयांतल्या लोकांचे प्रस्न समजून घेवचे खातीर आमी 29 जून ते 11 जुलय मेरेन गोंयची भोंवडी केली. आमचे भोंवडेक लागून सत्ताधारी पक्षांतल्या आमदारांक तांच्या मतदारसंघांत वचून लोकांची भेट घेवची पडली. हे पद्दतीन काय जायना, लोकांचे प्रस्न सुटावे जातले, अशी आस्त आसा. ते भायर उरिल्ले प्रस्न आमी विधानसभेंत मांडटले. आमकां उलोवपाक दिलें ना जाल्यार अधिवेशना उपरांत परतून गांवागांवांनी वचीन त्या प्रस्नांची फाटपुरवण करतले, अशें सरदेसाय हांणी सांगलें.
15 दिसांनी 2800 ईमेल
लोकांक तांच्यो समस्या मांडचे खातीर पक्षा वतीन ईमेल आयडी दिल्ली. 15 दिसांनी ताचेर 2800 ईमेल आयल्यात. आमी 45 तारांकीत, 240 अतारांकीत प्रस्न, 15 शुन्य वरांचो उल्लेख, 2 खाजगी विधेयका आनी हेर मार्गान लोकांचे प्रस्न विधानसभेंत मांडटले, अशें आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
