रेंट अ कॅब वेवसाय संकश्टांत?

भांगरभूंय | प्रतिनिधी

रेंट अ कॅब आनी बायक वेवसायिकांचो घुंवळे वखदां तस्करींत हात आसा, असो गंभीर आरोप जाला. ह्या प्रकरणांत हैदराबाद पुलीस आनी एनसीबीन कांय जाणांक अटक केल्या.

रेंट अ कॅब वेवसाय फाटल्या कांय दिसां सावन वादग्रस्त थारला. मांडवी पुलाचेर अपघात जालो. ती चलोवपी पर्यटक सोऱ्याचे नशेत आशिल्लो, हें सिद्ध जालें. आतां सरकारान प्रकरण गंभीरपणान घेतलां. वास्तविक गाडयो, मोटारसायकली, स्कूटरी भाड्यान दिवपाचो वेवसाय पर्यटन मळाचेर खूब नेटान चलता. कांय जाणांच्यो खंय 20-25 पसून गाडयो आसात. कायदेशीर परवानो घेनासतना स्वताच्यो खाजगी गाडयो भाड्यान दिवपीय वाडल्यात. कसलोय वेवसाय करतना मनाक येता तें करपाक मेळ्ळें आनी कोण विचारपी ना जाल्यार मागीर संबंदीत मदेतात. मागीर एक दीस स्वताच स्वताच्या पांयांचेर फातर मारून घेता. तसोच प्रकार रेंट अ कॅबाचे बाबतींत जाला, अशें म्हणूं येता. अपघाताक लागून तांचेर आतां खूब बंधनां येतलीं (खरें म्हणल्यार तीं पयलींच कित्याक घालूंक नात, असो कोणकूय प्रस्न पडटलो… आनी ताची जापूय ताचे कडेन आसतली!) रेंट अ कॅब आनी बायक वेवसायिकांचो घुंवळे वखदां तस्करींत हात आसा, असो गंभीर आरोपूय जाला. ह्या प्रकरणांत हैदराबाद पुलीस आनी एनसीबीन कांय जाणांक अटक केल्या. आनीकूय थोडे सांपडपाचे आसात. दर्यादेगां वयल्या कांय जाणांक गिरेस्तकायेची सूज आयल्या, ती घडये ह्या उपायां उपरांत देंवपाची शक्यता आसा.
मांडवी पुलार अपघात जालो, एकलो उसळून न्हंयेंत पडलो तेन्ना गोंयकारांनी साबार प्रतिक्रिया दिल्ल्यो. तातूंत रेंट अ कॅब वेवसायिकान स्वताचो ड्रायव्हर दवरचो, अल्कोमिटर वापरून पुलिसांनी त्या गाडयांचे ड्रायव्हर (पर्यटक) नशेंत आसात काय नात तें तपासचें, भितर सीसीटीव्ही बसोवचो, ही सेवाच बंद करची…. अशेंय कांय जाणांनी म्हणलां. येरादारी खात्यान आतां रेंट अ कॅबाच्या वेगाचेर नियंत्रण दवरपाक स्पीड गव्हर्नर बसोवपाचो निर्णय घेतला. जर तो बसोवंक ना जाल्यार तांकां वेवसाय करपाचो परवानो मेळचो ना. दोना परस चड गंभीर गुन्यांवांत सांपडत जाल्यार गाडी जप्त करून तिचो परवानो निलंबीत करतले. रेंट अ कॅबा सयत दरेका वाहनाक स्पीड गव्हर्नर बसोवप तशें सक्तीचें आसा. खंयच्या रस्त्याचेर खंयचें वाहन कितल्या वेगान चलोवपाचें तें कायद्यान थारिल्लें आसा. आतां रेंट अ कॅबाक ते बसोवचे पडटले. तेय मार्च म्हयनो सोंपचे पयलीं. कारण 12 मार्चाक ते विशींची बसका घेवपाचें येरादारी संचालकान थारायलां.
येरादारी खात्यान आनीक 91 जाग्यांचेर एआय कॅमेरे बसोवपाचें थारायलां. पूण जो मेरेन ड्रायव्हराक शिस्त लागना, तो मेरेन अपघात उणें जायत अशें दिसना. ब्लॅक स्पोटांचें काम हातांत घेतलां. तें बेगीन पुराय जावंक जाय. मुखेल रस्त्याचेर येरादारीची कोंयडी सदचीच जाल्या. तिचेर उपाय काडपाक जाय. फुडाराक पर्वरी – पणजी स पदरी रस्त्याचें काम सुरू जातलें. तेन्ना सगल्यांत गर्दी आशिल्ल्या ह्या मार्गा वयली येरादारी खंयच्यान वळोवपाची ताचोय विचार जाल्यार बरो. जोड रस्ते, शाॅर्टकट रस्ते रुंद केल्यार लोकांचे त्रास इल्ले तरी उणे जातले. रेंट अ कॅब वेवसाया विशीं कागाळी आयिल्ल्यान येरादारी खात्यान तो प्रस्न प्राधान्यक्रमान हाताळपाचो थारायलां, पूण हेर येरादारीचेरुय लक्ष दिवचें.
दर्यादेगां वयले ड्रग्स तस्करींत रेंट अ बायक आनी कॅब वेवसायिकांचो सहभाग आसा, अशें तपास यंत्रणेक दिसून आयलां, ही हुस्क्याची गजाल. कांय जाणां खातीर पर्यटन ही भांगराचें तांती दिवपी कोंबी थारल्या. ताका लागून केन्ना एकदां झटपट तीं तांतयां विकून आपूण गिरेस्त जातां, हाचींच सपनां जायत्या जाणांक पडपाक लागल्यांत. आमच्या राज्याक फोंडांत घालपाची ती कृती थारतली. एका नायजेरियन तस्कराच्या घरकान्नीक अटक जाल्या. दोगा कॅब आॅपरेटरांक धरल्यात. टॅक्सी धनी, रेंट अ बाईक आनी कॅब ऑपरेटर हांचे मजतीन फाटलीं कितलींशीच वर्सां ड्रग्सांची तस्करी चल्ल्या, असो दुबाव एनसीबीन उक्तायला. हो नायजेरीयन तस्कर फक्त गोंयांतल्यो दर्यादेगोच न्हय, तर गोंयां भायर साबार राज्यांनी तस्करी करता आनी तातूंत रशियन आनी काय गोंयकार तरणाटेय घुस्पल्यात असोय एनसीबीक दुबाव आसा. ते नदरेन तांचो तपासूय चलता.
रेंट अ कॅब, बायक वेवसाय करपी सगलेच चुकीच्या मार्गार चलतात, अशें कोणूच म्हणचो ना. मात, पाटल्यांतल्या एका कुसक्या आंब्याक लागून सगलेच आंबे कुसतात, तसलो हो प्रकार जाला. हो वेवसाय बंद जाल्यार बेरोजगारी वाडटली. पर्यटन मळाचेर परिणाम जावं येता. तेन्ना रेंट अ कॅब वेवसायिकांनी हाचेर कितें उपाय करूं येता, हाचेर सगल्यांत पयलीं विचार करपाक जाय. कारण तांकांच हातूंतल्यो खाचो- खळगे बेसबरे खबर आसात!