भांगरभूंय | प्रतिनिधी
अपघातांक लागून परमीट दिवपाचेर घाली बंदीः मॉवीन गुदिन्हो
पणजीः गोंयांत रेंट अ कारींक लागून अपघात जावपाचें प्रमाण बरेंच वाडलां. दर म्हयन्याक सरासरी तीन अपघात रेंट अ कारींक लागून जातात. फाटल्या तीन ते साडेतीन वर्सांचे तुळेन रेंट अ कारींक लागून 54 अपघातांनी वाड जाल्ल्याची नोंद जाल्या. ह्या वाडट्या अपघातांक लागून मुख्यमंत्र्यांनी रेंट अ कार परमीट दिवपाचेर बंदी घाल्या अशी लेखी म्हायती येरादीर मंत्री माॅवीन गुदिन्हो हांणी दिली.
विधानसभेच्या पटलार कुडटरीचे आमदार आलेक्स रेजिनाल्ड लोरेन्स हांणी विचारिल्ल्या प्रस्नांक लेखी जाप दितना येरादारी मंत्र्यान सांगलें की येरादारी खात्यान रेंट अ कॅब खातीर 10 लिसेन्सा दिल्यात ताचे सकयल 6,762 परमीट दिल्यात.
वर्स 2022सात रेंट अ कारींक लागून 38 अपघात जाल्ले, 2023सात ह्या आंकड्यात परतून वाड जावन 43 अपघात जाल्ले, वर्स 2024सात हो आंकडो हिसपा भायर वाडलो आनी वट्ट 92 अपघात जाल्ले आनी ह्या वर्सा 2025सात जानेवारी ते 30 जून मेरेन 28 अपघात नोंद जाल्यात.
रेंट अ कार आनी रेंट अ बायक चलोवपी पर्यटक सोरो पियेवन बेजापासलदारपणान हाडबडीत वाहनां चलयतात देखून रस्त्यार जावपी अपघातांनी व्हडली वाड जाल्या हाची नोंद घेवन मुख्यमंत्री डॉ. प्रमोद सावंत हांणी फेब्रुवारी 2024सात ही रेंट अ कॅब लिसेन्सां स्थगीत दवरपाचो आदेश दिल्लो.
ह्या आदेशाक पाळो दीत राज्य येरादारी प्राधिकरणान 24 फेब्रुवारीक बसका घेवन नवे रेंट अ कॅब लिसेन्सां दिवपाचेर स्थगिती दिवपाचो निर्णय घेतलो. गोंय हे एक नामनेचें पर्यटन थळ आशिल्ल्या कारणान देशी आनी विदेशी पर्यटक सेगीत गोंयाक भेट दितात. भेट दिवपी चडशे पर्यटक रेंट अ कार हो येरादारीचो पर्याय निवडटात. पूण, खात्याक अशें दिसून आयलां की खूबशे जाण हीं वाहनां थळावे ट्राफ्रीक नेम आनी रस्त्याची परिस्थिती हांची जाणविकाय नासतना चलयतात. ह्या कारणांक लागून रस्तो अपघातांत सेगीत वाड जाल्या आनी ह्या अपघातांनी खूबशे पर्यटक आनी थळावे गंभीर जखमी जाल्यात तशेंच तांकां मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
