भांगरभूंय | प्रतिनिधी
कांपालच्या नुस्तेकारांचे पणजेच्या महापौराक गाराणे
भांगरभूंय । प्रतिनिधी
पणजीः कांपालाचे नुस्तेकारांक रॅम्प बांदून दिता अशें सांगून स्मार्ट सिटीन फटयलां. तशेंच जे सुवातेर नुस्तेकार पोनेळ लायताले ते सुवातेवेल्यान पोनेळ काडपाक लायले, असो आरोप कांपाला वयल्या नुस्तेकारांनी केला. हो विशय सुटावो करपा खातीर काँग्रेसी बरोबर महापौर रोहीत मोन्सेरात हांची भेट घेतली. महापौरान ह्या विशयात लक्ष घालपाचें आश्वासन दिलें.
पणजी गट काँग्रेस समितीच्या वांगड्यांनी महापौर रोहीत मोन्सेरात हांची भेट घेतली आनी तांका हे विशींचे निवेदन भेटयलें.
ह्या वेळार उलयतना गट अध्यक्ष प्रतिभा बोरकार हिणें सांगलें, आमी कसलीच घोशणा निशेध वा आंदोलन करपाक येवंक नात. आमी शांतीकायेन निवेदन भेटोवपाक आयल्यांत. जर मागण्यो पुराय जावंक ना जाल्यार आंदोलन करपाचो वेळ येतलो.
नुस्तेकारांच्यो तीन पिळग्यो हांगासर नुस्तेमारी करून संवसार चलयतात. जर अचकीत पोटार पांय दवरलो जाल्यार ते खंय वतले. जर तांचे सुवातेर तुमी सोबीतकरण करपाक सोदता वा रॅम्प घालून दिवपाक सोदता जाल्यार तांकां दुसरी सुवात सोदून दिवची. सुमार 30 नुस्तेकारांची कुटुंब हांगा वेवसाय करतात तांकां घेवन आमी महापौराक मेळपाक आयल्यात, अशें बोरकार हिणें सांगलें.
आमचो पांय आसलो तेन्ना सावन आमी पोनेळ लावन धंदो करता. स्मार्ट सिटीचे काम सुरु जाल्ले तेन्ना सांगिल्ले, आमकां एक रॅम्प तयार करून दिता. हे काम करपा खातीर पोनेळ थोडे दिसा खातीर भायर दवरात अशें सांगिल्ले, अशें एका थळाव्या नुस्तेकारान सांगलें.
फकत लॅपटॉपाचेर डिझायन दाखयलें. आमका लेखी आश्वासन कसलेच दिवंक ना. आमी ताका हयकार दिलो. आतां रॅम्प बांदून तयार जाला पूण आमका सुवातच दिवंक ना. पावसात पोनेळांचे लुकसाण जायत म्हूण आमी न्हंयेक तेकूंन आशिल्ले रेंवेच्या दोंगराचेर पोनेळ दवरताले, पूण स्मार्ट सिटीन थंयसरूय काडूंक लायले. हे पोनेळ आता दवरपाचे खंय, असो प्रश्न थळावे नुस्तेकारांन उप्रासला.
नुस्ते जाळ्यांक लागल्यार लागले जाल्यार ते वांटपाक सुवात जाय. स्मार्ट सिटीन फटींगपणा केल्ल्यान आमका दुसरी सुवात दिवची अशी मागणी करपा खातीर आमी महापौरा कडेन मागपाक आयल्यात. शिष्टमंडळाक जाप दितना महापौर रोहीत मोन्सेरात हांणी सांगलें, स्मार्ट सिटी, जीएसआयडीसी हांची नुस्तेकारां बरोबर पणजी महानगरपालिका जोड बसका घडोवन हाडटले आनी प्रश्न जाग्यार घालतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
