भांगरभूंय | प्रतिनिधी
संस्थांनी 24/7 अँटी-रॅगिंग हेल्पलायन आनी अनामिक कागाळ पद्दत चालीक लावची, जाका लागून विद्यार्थ्यांक बदलो घेवपाची भिरांत नासतना घडणुकांची म्हायती दिवंक मेळटली.
रॅगिंगाक लागून विद्यार्थ्यांक गंभीर मानसीक आनी शारिरीक आघात जाता. शिक्षणीक संस्थांची प्रतिश्ठेक खत लागता. शाळा आनी म्हाविद्यालयांनी प्रतिबंधात्मक पद्दत आपणावप आनी रॅगिंग ना करपा खातीर खर उपाय चालीक लावप खूब म्हत्वाचें.
“बरी करपा परस आळाबंदा हाडप बरें!” हाचेर एक खर उपाय म्हूण दरेके संस्थेन प्राध्यापक, बिगर शिक्षक कर्मचारी, विद्यार्थी आनी पालक हांचो आस्पाव आशिल्ली एक समर्पीत रॅगिंग विरोधी समिती घडोवची. तिणें विद्यार्थ्यांच्या संवादाचेर नदर दवरची आनी खंयचीय कागाळ बेगोबेग सोडोवची. जातूंत मात्सो बदल दिसतलो. हाका लागून जागृताय मोहीम आनी कार्यशाळा करच्यो पडटात. रॅगिंग विरोधी जागृताय कार्यावळी, परिसंवाद आनी कार्यशाळा नेमान घडोवन हाडपाक जाय. परिसंवाद आनी कार्यशाळा घडोवन हाडप तशेंच रॅगिंग संबंदीत लघुपट दाखोवप विद्यार्थ्यांक रॅगिंगाच्या हानीकारक परिणामां विशीं शिक्षण दिवंक शकता.
वरिश्ठ विद्यार्थ्यांक मार्गदर्शक आनी सकारात्मक आदर्श म्हणून काम करपाक प्रोत्साहन दिवप कॅम्पस संस्कृताय बदलपाक शकता. तशेंच वसतीघराचे खर नेम आनी देखरेखीची अंमलबजावणी करपाची उपाय येवजण म्हणून वसतीघरांनी विद्यार्थ्यांच्या वागणुकेचेर बारीकसाणेन नदर दवरपा खातीर सक्रिय वार्डन नेमचे. पयल्या वर्साच्या विद्यार्थ्यांक वेगवेगळ्या वसतीघरांनी वा नियुक्त सुरक्षीत वाठारांनी दवरल्यार संभाव्य रॅगिंगचो धोको उणो जावंक शकता. हाचे भायर व्यापक सीसीटीव्ही कव्हरेज, 24×7 सीसीटीव्ही पळोवणी आनी सुरक्षा निरिक्षण स्थापन करून हॉस्टेल आनी सामान्य वाठारां सयत कॅम्पसभर सुरक्षा समर्पीत कर्मचाऱ्यांचो पंगड आसल्यार संभाव्य रॅगिंग घडणुको आडावंक मेळटात आनी विद्यार्थ्यांची सुरक्षीतताय सगळ्या वेळार सुनिश्चीत करूं येता.
हेल्पलायन क्रमांक तरतूद सोडल्यार संस्थांनी 24/7 अँटी-रॅगिंग हेल्पलायन आनी अनामिक कागाळ पद्दत चालीक लावची, जाका लागून विद्यार्थ्यांक बदलो घेवपाची भिरांत नासतना घडणुकांची म्हायती दिवंक मेळटली. अधिकाऱ्यांनी अशा कागाळींचो बेगोबेग फाॅलोअप करचो आनी प्रभावी प्रतिसाद दिवचो. विद्यार्थ्यांक रॅगिंगांतल्यान सुटका मेळची म्हणूनच हें सक्तीचें करप गरजेचें आसा…..
– बालकृष्ण मालवणकार
80100 53622
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
