भांगरभूंय | प्रतिनिधी
वास्को : रुमडावाडो, मुरगांवां गाडयांच्या ‘वॉशिंग सेंटरा’ लागसारा वेगान आयिल्ले गाडयेचो धपको बसून मल्लीनाथ गौडर (५५) ह्या दुचाकी चालकाक मरण आयलें. अपघातांत मरण आयिल्लो मल्लीनाथ हो ऍक्टीवा स्कूटर घेवन रस्त्याच्या कुशीक राविल्लो तेन्ना गाडयेन येवन ताका धपको दिलो.
अपघाता उपरांत जखमीक चिखले एसडीएच हॉस्पिटलांत व्हरतना वाटेरूच ताका मरण आयलें. पुलिसांनी गाडी चालक श्रीकृष्ण बांदेकार (२०) ह्या बायणाच्या तरणाट्या आड गुन्यांव नोंद केलो.
पुलिसांनी हे विशीं म्हायती दिल्ले प्रमाण, शेनवारा सांजेवेळार हो अपघात जालो. ह्युडंई आय १० स्पोर्ट्स कार चालक वेगान सड्यावेल्यान वास्कोचे दिकेन वतालो. रुमडावाड्यार पावतांच तांणी रस्त्या कुशीक ऍक्टीवा स्कूटर घेवन राविल्ल्या मल्लीनाथ हाका नेटान धपको दिलो.
हे विशीं फुडलो तपास उपनिरीक्षक सूरज नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
