भांगरभूंय | प्रतिनिधी
मडगांव : रुमडामळ दवर्ली हावसिंग बोर्ड वाठारांत दोन वर्सां पिरायेच्या सानुल्याक बुडून मरण आयिल्ल्याची घडणूक सोमारा घडली. घरा भायर खेळटना तोल वचून गटारांत पडिल्ल्यान ताका मरण आयलें. ह्या प्रकरणांत मायणा कुडटरी पुलिसांनी असैमीक मरण अशी नोंद केल्या.
मेळिल्ले म्हायती प्रमाण, बिराडाच्या घरांत उत्तरप्रदेश- सुंदरापूरचो शौनक अली हो कुटुंबा सयत रावता. सोमारा सांजेवेळार शौनक हांचो दोन वर्सां पिरायेचो पूत शिफन घरा भायर खेळटालो. खेळटना तो भायल्या उक्त्या गटारांत पडलो. तें कोणाच्याच लक्षांत येवंक ना. बरोच वेळ तो दिसूंक नाशिल्ल्यान ताचो सोद घेतना ताची कूड गटारांत सांपडली. उपरांत हाची म्हायती मायणा कुडटरी पुलिशेक दिली.
पुलीस आनी थळाव्या नागरिकांनी ताची कूड गटारांतल्यान भायर काडली. पुलीस निरीक्षक अरुण गांवस देसाय हांच्या मार्गदर्शना खाला उपनिरीक्षक वेरोनिका कुतिन्हो चवकशी करतात.
मजगतीं, मरण आयिल्ल्या भुरग्याच्या पालकांनी हो घातपाताचो प्रकार आशिल्ल्याचो अदमास उक्तायला. हो भुरगो ह्या गटारा कडेन येवपाक शकना. तो जनावरांक भियेता, वांगडा कोणाक घेतले बगर तो भायर सरनाशिल्लो. हाका लागून पुलिसांनी चवकशी करून सत कितें तें मुखार हाडचें अशी मागणी केल्या.
पंच सैमुल्ला फणीबंध हांणीय खोलायेन चवकशी करपाची मागणी केल्या. सध्या भुरग्याची कूड दक्षीण गोंय जिल्लो हॉस्पिटलांतल्या मोर्गांत दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
