भांगरभूंय | प्रतिनिधी
पॉवर हावसा लागसार घडली घडणूक, पंच जखमी मडगांवः मडगांवच्या पॉवर हावस फास्ट फूड स्टॉल लागसार रुमडामळ-दवर्ली पंचायतीचे पंच वांगडी विनायक वळवयकार हांचेर कांय जाणांनी जीवघेणो हल्लो केलो. हातूंत पंच वळवयकार हांचे तकलेक आनी तोंडाक मार बसला. तांचेर दक्षीण गोंय जिल्लो हॉस्पिटलांत उपचार सुरू आसात.
शुक्रारा रातीं 12:00 वरांचे सुमाराक मडगांवां पॉवर हाऊसा लागसार हो हल्लो जालो. पंच वळवयकार हांणी दिल्ले म्हायती प्रमाण, पॉवर हाऊसा लागसारच्या फास्ट फूड स्टॉलांतल्या कामगारांनी रातच्या वेळार फोन करून दोग तरणाटे येवन फास्ट फूड स्टॉलांत तोडफोड करतात अशें सांगलें.
ते उपरांत आमी तांकतिकेन थंय गेले तेन्ना ते तरणाटे आमचे कडेन वाद घालपाक लागले. तेन्ना थंय आशिल्ल्यान तरणाट्यांनी तू कोण व्हड जाला अशें विचारून झगडीं करपाक लागले. तशेंच थंय फाटल्यान आशिल्ल्या कोणे तरी तकलेर कितें तरी मारले. ते उपरांत तांणी आनीक कांय जाणांक आपोवन तकलेर बाटली मारली तशेंच मुठींनी तोंडार मारले. तशेंच लाथाबुक्क्यांनी मारपेट केली. त्या तरणाट्यांक आमी नांवान वळखना. तांचे कडेन पयलीं कसलोच वाद जावंक नाशिल्लो. कांय जाण पळोवपांतले आसात, कामगारांक कांय जाणांचीं नांवां खबर आसात. आदले दुस्मानकायेंक लागून ही घडणूक घडली काय कितें तें कळना. अचकींत आठ ते धा जाण थंय येवन मारपेट करतात हाचे वयल्यान हो प्रकार पूर्वनियोजीत अाशिल्ल्याचे दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
