भांगरभूंय | प्रतिनिधी
मडगांव : फाटले तीन म्हयने सरपंच, उपसरपंचां बगर चलपी रुमडामळ दवर्ली ग्रामसभेंत आयतारा णव पंच वांगड्यां मदले एकूच पंच वांगडी हाजीर रावलो. हे ग्रामसभेंत बेवारशी सुण्यां विशीं नागरिकांनी प्रस्न मांडलो. सुण्यांचें लसीकरण करतले, अशेंय सचिवांनी स्पश्ट केलें.
रुमडामळ दवर्ली पंचायतीची ग्रामसभा आयतारा सकाळीं पंचायतीच्या सभाघरांत जाली. सरपंच आनी उपसरपंचांनी राजीनामो दिले उपरांत हे पंचायतीचेर फाटले तीन म्हयने प्रशासकाची नेमणूक केल्या. प्रशासक प्रदीप ताम्हणकार हांचे अध्यक्षते खाला जाल्ले हे ग्रामसभेंत पंचायतींतल्या णव वांगड्यां मदले. फकत सोफिया शेख ही हाजीर रावली. तशेंच ग्रामस्थांचो आंकडोय आठां परस चड नाशिल्लो. हे ग्रामसभेंत लोक उणे आसले तरी हाजीर आशिल्ल्यांनी आपापल्यो समस्या मांडल्यो. हातूंत घराचे कुशीक पावसाचें उदक वचपाच्या गटारांतल्यान घाणयारें उदक सोडपाचे प्रकार घटडटात. ताचेर कारवायेची मागणी केली. बेकायदेशीर बांदकामांचो प्रस्न सेगीत मुखार आयिल्ल्यान पंचायतीन कागदपत्रांची पळोवणी करपाची मागणी केली. रस्त्यावेल्यो लायटी बंद आशिल्ल्याच्यो कागाळी केल्यो. तशेंच रस्त्या कुशीकचे नितळसाणीचीं कामां करपाचीं उरल्यांत अशें थळाव्यांनी सांगलें. तीं कामां करून घेतले, अशें प्रशासकांनी स्पश्ट केलें. नागरिकांनीय आपली जापसालदारकी पाळपाची गरज आसा. फकत पंचायत करतली म्हूण कोयर उक्त्यार उडोवप, घाणयारें उदक गटारांत सोडप ह्यो गजाली करच्यो न्हय, अशेंय तांणी सांगलें.
बेवारशी सुण्यांचो प्रस्न चर्चेक
ग्रामसभेंत बेवारशी सुण्यांचो प्रस्न चर्चेक आयिल्लो. सध्या बेवारशी सुण्यांचो आंकडो वाडला. भुरग्यांचेर आनी गाडयांवेल्यान वचप्यांच्या फाटल्यान सुणीं लागतात. असल्यो घडणुको बर्योच वाडिल्ल्याचें पंच सोफिया हांणी सांगलें. हाचेर जिल्हाधिकार्यां वांगडा बेवारशी सुण्यांच्या वाडिल्ल्या आंकड्याचेर चर्चा जाल्या. सुण्यांचें लसीकरण करतले. सुणे मोगींनी गाडी आयले उपरांत सुण्यांक धरपा खातीर सहकार्य करचें, अशेंय ताम्हणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
