भांगरभूंय | प्रतिनिधी
पुलीस अधिक्षक सुचेता देसाय जखमी
भांगरभूंय | प्रतिनिधी
मडगांवः रुमडामळ पंचायत मैदानाचेर शेनवारा एके शाळेच्या वर्सुकी खेळां दिसाचें उक्तावण करतना नायट्रोजन वायून भरिल्ल्या बलुनाक उजो लागलो. ह्या वेळार उक्तावणाक हाजीर आशिल्ली पुलीस अधिक्षक (ट्रेनींग) सुचेता देसाय जखमी जाली. उपचारा खातीर तांकां हॉस्पिटलांत व्हेली. उपचारा करून तांकां डिस्चार्ज दिलो.
मेळिल्ले म्हायती प्रमाण, रुमडामळ अंजुमन इस्लाहूल मुसलमान शाळेचो वर्सुकी खेळां दीस 30 तारखेक मनयताले. हे कार्यावळीक मुखेल सोयरी म्हूण पुलीस महानिरिक्षक ओमवीर सिंग बिश्नोई हाजीर रावपाचे आशिल्ले. पूण, कांय कारणांक लागून तांकां हे कार्यावळीक हाजीर रावूंक मेळ्ळें ना. कार्यावळीक मुखेल सोयरी म्हूण पुलीस अधिक्षक (ट्रेनींग सेल) सुचेता देसाय हाजीर आशिल्ली.
कार्यावळीच्या उक्तावण सुवाळ्यांत खेळां मशाल पेटयली. ते उपरांत मळबांत बलून सोडून खेळां दीस सुरू करपाचो आशिल्लो. पुलीस अधिक्षक सुचेता देसाय आनी हेर मानेस्त माचयेर हाजीर आशिल्ले तेन्ना बलुनाक उजो लागपाची घडणूक घडली. त्या वेळार नायट्रोजन वायून भरिल्ल्या बलुनाचो स्फोट जावन व्हड उजो पेटलो. हातूंत पुलीस अधिक्षक सुचेता देसाय हांच्या तोंडाक आनी तकलेक दुखापत जाली. हाचे भायर माचयेर हाजीर आशिल्ले हेर मानेस्तूय जखमी जाल्यात. हाचे उपरांत पुलीस अधिक्षकाक ताकतिकेन खाजगी हॉस्पिटलांत व्हेली. मुळाव्या उपचारा उपरांत तांकां डिस्चार्ज दिलो. खेळां दिसाच्या आयोजकां कडेन संपर्क केलो तेन्ना अशी घडणूक घडल्या, पूण व्हडली दुर्घटणा जावंक ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
