भांगरभूंय | प्रतिनिधी
मडगाव: रुमडामळ दवर्ले पंचायत वाठारांतल्या फुटबॉल मैदाना कुशीक आशिल्ल्या रॅस्टोरंण्टाक उजो लागपाची घडणूक शुक्रारा सांजवेळा घडली. हातूंत दुकानांतलें सगलें साहित्य आनी दोन दुचाकी लासून गेल्यो. हातूंत सुमार तीन लाखांचें लुकसाण जालें. मडगांव उजो पालोवपी दळाच्या जवानांनी उज्याचेर नियंत्रण हाडलें.
रुमडामळ दवर्ले फुटबाॅल मैदाना कुशीक एका रॅस्टोरंण्टांक शुक्रारा सांजवेळा सात वरांच्या सुमाराक उजो लागलो. अचकीत लागिल्ल्या उज्यान भिरांकूळ रुप धारण केलें. हातूंत दुकानांत दवरिल्ल्या दोन गॅस सिलिंडराकूय उजो लागून तांचो स्फोट जालो.
हे घडणुकेची म्हायती मेळटकच मडगांव उजो पालोवपी दळाचे अधिकारी आनी जवान घडणूक थळार पावले. दळाच्या जवानांनी उज्याचेर उदकाचो मारो करून उजो नियंत्रणांत हाडलो. ह्या उज्यांत दुकानांतल्या सगल्या सामानाचो गोबोर जालो.
गॅस सिलिंडरांतले गॅस गळटीक लागून ही घडणूक घडली अशें घडणूक थळार हाजीर आशिल्ल्या लोकांनी सांगलें. गॅस सिलिंडराक उजो लागतकच रॅस्टोरंण्टोतल्या कामगारांनी भायर धांव मारली. उजो वाडत गेलो तशेंच दोन सिलिंडराचोय स्फोट जालो. ह्या उज्यांत भायर उब्यो केल्ल्यो दोन दुचाकीचोय गोबर जालो. तशेंच कुशीच्या इमारतींनी रावपी कुटुंबांतल्या भुरग्यांकूय उज्याची थोडी भोव झळ पाविल्ल्याचेंय थळाव्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
