भांगरभूंय | प्रतिनिधी
रुपया निसरला. काल 1 डाॅलराचे तुळेन ताचें मोल 90 रुपया आशिल्लें. आतां मेरेनचो हो निचांक. रुपया निसरप म्हणल्यार कितें? अमेरिकेंतल्यान 100 डाॅलर घेवन आयल्यार ताका पयलीं 8000 रुपया मेळटाले, ते आतां 9000 जाल्यात. हाकाच डाॅलर बळिश्ट जावप म्हणटात. अशें जाल्यार आयात म्हारग जाता. भारताक तेल, गॅस, वखदांचो कच्चो म्हाल, यंत्रां, सुको मेवो… बरेंच कितें भायल्यान हाडचें पडटा. रुपया दुबळो पडलो काय चड दुडू फारीक करचे पडटात. मागीर इंधन, इलेक्ट्राॅनिक्स, गाडयो बी म्हारग जातात. हेर म्हारगायूय वाडटा. परदेशी कंपनी भारतांत आयल्यार तिका मात फायदो जाता. कारण तांचे डाॅलर रुपयांत रुपांतरीत करतकच चड पयशे मेळटात. निर्गत करपी भारतीय कंपनीं म्हाल डाॅलरांनी विकतात. तांकां डाॅलरा फाटल्यान 90 रुपया मेळटात… फायदोच फायदो. हांगाच्या कंपनींक मात भायलो म्हाल डाॅलरांनी घेवचो पडटा.
शॅर बाजार कोसळिल्ल्यान, परदेशी निधी काडिल्ल्यान रुपया वाडला, अशें ‘शॅर’कारांचें मत. रुपया 91 चेर पावतलो, असोय तांचो दावो. विरोधी पक्ष म्हणटात, डाॅलर 100 रुपया जातलो. तें कितेंय आसलें, तरी रुपयाचे निसरणीक आडो घालपाचो यत्न जावंक जाय. ‘आमकां कित्याक पडलां तें?’ अशी भुमिका कोणे घेवंक जायना. आदल्या फुडाऱ्यांचेर हो बुडकुलो फोडपाक जायना.
1 जानेवारीक रुपया 85.70 आशिल्लो, तो आतां 90.14 चेर पावला. आयात वस्तू म्हारग जातल्योच, विदेशांत भोंवडेक, शिक्षणाक वचपूय म्हारग जातलें. 1947 त डाॅलराचे तुळेन रुपयाचें मोल साडेतीन आशिल्लो. 1960 त 4.80, पं. नेहरुंच्या निमण्या काळांत रुपया 4.78 चेर पाविल्लो. 1991 त जागतिकीकरण जालें, अर्थवेवस्था उक्ती जाली, आयात वाडली, डाॅलराचें म्हत्व वाडलें आनी रुपया निसरत गेलो. संवसारीक अर्थीक संकश्टा वेळार 2008 च्या सुमाराक डाॅलराचें मोल 63 रुपयांचेर पाविल्लें. तेन्ना व्हडलो बोवाळ जाल्लो. पूण ही निसरण बंद जावंक ना. काल तर सेन्सेक, निफ्टीकूय देंवती कळा लागिल्ली. जाणकार म्हणटात, रुपया तणावा खाला आसा. कारण विदेशी भांडवली गुंतवणुकदारांनी (बँको, फंड्स, विमो कंपनी, व्हडले गुंतवणूक) व्हड खरेदी (बाँड, शॅर्स बी) केल्ल्यान पयसो भायर गेला. तेलाचे, भांगराचे खरेदीक लागून पयसो भायर वचपाक लागला. विदेशी चलन सांठ्यांत अमेरिके इतलेच डाॅलर आसल्यार रुपयाचें मोल थीर उरतलें. डाॅलराचो सांठो वाडल्यार रुपया परत 60-70 चेर पावुये. एफआयआय (विदेशी संस्थात्मक गुंतवणूकदार, आतां एफपीआय आनी एफआयआय हांकां एकूच मानतात) भारतांतलो पयसो काडटात. ते रुपयाचें डाॅलरांत रुपांतर करतात, तेन्ना डाॅलराचें मोल वाडटा. भारतान कच्चो म्हाल, इंधन हांची आयात उणी केल्यार रुपया सुदारतलो. अमेरिकेंत व्याजदर वाडल्यार गुंतवणूकदार डाॅलरांच्या मोगांत पडटात. आमचो इश्ट डोनाल्ड ट्रम्प हांणी अमेरिकेंत नाका जाल्लीं धोरणां चालीक लायल्यांत, ताचोय परिणाम रुपयांचेर जाला. रुपया कोणा एके व्यक्ती, सरकाराक लागून मातये भरवण जायना. तर संवसारीक आनी देशांतल्या अर्थीक शक्तींचो तो एक परिणाम.
रुपया घटमूट करपाक उद्देग- वेपार मळाक आयात उणी करची पडटली. अवलंबून रावप सोडचें पडटलें. थळावें उत्पादन, पुनर्निमिती वाडोवची पडटली. पर्याय सोदचे पडटले. निर्गत वाडोवची पडटली. सामान्य भौसूय बरेंच कितें करूं शकता. तांचें परकी उत्पादनाचें आकर्शण कमी जायत, ते थळावें उत्पादन, वस्तूंचेर भर दीत जाल्यार हें चित्र बदलतलें. दुसरे वटेन देशी उत्पादनां वाडोवचीं पडटलीं. लोकांनी स्वदेशी उत्पादक, भारतीय निर्गत कंपनींनी स्टाॅक, म्युच्युअल फंडा वरवी गुंतवणूक करची पडटली. रुपया ‘डिप्रेशनां’त वचप ही संवसारीक अर्थीक प्रक्रिया. तरीय तो चडूच कोमांत वच्चो ना, हे खातीर आतांच उपाय घेतल्यार बरे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
