भांगरभूंय | प्रतिनिधी
भांगरभूंय । प्रतिनिधी
दिवचलः हरवळ्यांतलें श्री रुद्रेश्वर हें भंडारी समाजाचें देवूळ आसा. देवळांतले सगले सण, उत्सवांत फकत भंडारी समाजाकूच अधिकार आसात. देवस्थनाच्या घटने प्रमाण हें सगले चलंत आसतना वरचें हरवळ्यांतल्या सातेरकार गट देवळांतल्या सणांत आपलो हक्क दाखोवपाचो यत्न करून राजकी फाटबळग्यान गोंदोळ घालतात, असो आरोप रुद्रेश्वर देवस्थान समितीचो सचीव सुभाष किनळकार हाणे पत्रकार परिशदेंत केलो. देवस्थान कार्यलयांत घेतिल्ले ह्या पत्रकार परिशदेक समितीचो अध्यक्ष यशवंत माडकार, उपाध्यक्ष दीपक नायक, मुखत्यार संघेश कुंडयकार हाजीर आशिल्ले.
फाटल्या आयतारा म्हयन्याळी पालखी भायर काडपा मेरेन कसलोच विशय नाशिल्लो पूण रातयां 8 वरांचरे पालखी भायर काडल्या उपरांत महाशिवरातीच्या दिसा रुद्रेश्वर देवळांत गोंदोळ घातिल्ल्या लोकांनी परत एक फावट गोंदोळ घालून पालखेक खांदो मारपाचो बेकायदेशीरपमा केलो. गोंदोळ घालपी ह्या लोकां आड देवस्थान समितीन दोन फावट पुलीस कागाळ केल्या. ताकां देवळांत येवपा पसून पुलिसांनी आडावपाक जाय आशिल्लें. मात राज्य प्रशासनान ताकां जाय तशी मेकळीक दिल्ल्यान गोंदोळ घालपाचो व्हो प्रकार घडलो अशें किनळकार हाणे सांगलें.
पालखेक कृशी मंत्री रवी नाक हाजीर आशिल्ले. तांच्या सामकार व्हो प्रकार जालो. देवस्थान समितीचो उपाध्यक्ष दीपक नायकाचेर खूर्ची मोखून मारून ताका दुखापत केली. घटने प्रमआम देवळांतल्या सगल्या उत्सवांचेर भंडारी समाजाचो अधिकार आसतना हे लोक जाणा जावंन उत्सवांत आपलो हक्क सांगतात अशे तांणे सांगलें.
श्रीपाद नायकाक फकत मतां जाय
खासदार श्रीपाद नायक हांका समाज नाका. पालखे खातीर तांणी हरवळ्यां येवपाक जाय आशिल्लें. मात ते वेंचणुकेच्या राजकारणांत व्यस्त आसात. तांकां समाज नाका सव्वे फावट खासदार म्हणून वेंचून येवपाक फकत मतां जाय अशें सांगून सध्या भंडारी समाजाक मेजपाक येतले अश्या गोंदोळ घालपी लोकांनी आव्हान दिलां. भंडारी समाज जागो जावंन एकठांय आयलो ना जाल्यार फुडाराक ह्या समाजाचें अस्तित्व तिगप कुस्तार आसा अशें म्त किनळकारान उक्तायलें.
उच्च न्यायालयाच्या आदेशा प्रमाण धर्मीक पांवड्यार आमचो हक्क आसतनाय आमचेर अन्याय जाता. हाच्या फुडें घटने प्रमाण देवळांतले काम चलतलें. ह्या देवळांत फकत वरचें हरवळ्यांतले केळबायकार आनी जोगसकार हेच संलग्गीन आसात. हेर कोणूय लागनात. हाच्या फुडें कोंणीय देवळांत नाशिल्लो आपलो हक्क दाखोवपाचो यत्न करचो न्हय अशें तांणे सांगलें. हाच्या फुडें भंडारी समाजाचो ज्येश्ठ फुडारी रवी नायक हांच्या मार्गदर्शना खाला सगलें चलतलें. गोंयांतलो भंडारी समाज फकत रवी नायक हांच्या फाटल्यान आसा. श्रीपाद नायक हाच्या वांगडा कोणूय ना. रवी नायका हांका समाजा विशीं कळवळो आसा देखून ते पालखेच्या दिसा रातयां उसरां मेरेन हरवळ्यांत आशिल्ले. “एक भंडारी नेक भंडारी” ह्या प्रमाण लोकसभा वेंचणुकेची आचार संहिता सोपल्या उपरांत सगल्या मतदारसंघांनी वचून भंडारी समाजाच्या विरोधांत कटकारस्थाना करपी राजकारण्यांक तांची सुवात आमी दाखोवन दितले अशें किनळकारान सांगलें.
देवस्थानांत गोंदोळ घालपी लोकां आड आमी कागाळी करून लेगीत तांच्या आड कारवाय जायना. तांका चवकशेक लेगीत आपयनात. आमचेर सगली बंदना घालतात. पुलीस आनी प्रशासनाचेर कोणाचें चेंपण आसा असो प्रश्न करून रुद्रेश्वर देवूळ भंडारी समाजाचेंच आसा. घटने प्रमाण सगले सण आनी प्रथा चलतल्यो. तातूंत कसलोच बदल जावचो ना अशें यशवंत माडकार हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
