भांगरभूंय | प्रतिनिधी
भांगरभूंय । प्रतिनिधी
पणजीः हरवळे हांगच्या रुद्रेश्वर मंदिरांत फाटल्या आयतारा जाल्ल्या पालखी उत्सवा वेळार भंडारी समाजांतले पुराय गोंयांतल्या आयिल्ले लोक हाजीर आशिल्ले. त्या दिसा जाल्ल्या वादा संबंदींत कोणाकूय विस्वासांत घेनासतना देवस्थान समितीन केल्ली तडजोड भंडारी समाजाक बिलकूल मान्य ना, हे विशीं समाजाचे बसकेंत आमी मंदीर समितीन जाप विचारतले असें आम आदमी पक्षाचे आनी भंडारी समाजाचे फुडारी अमित पालेकार हांणी सांगलें.
रुद्रेश्वर देवस्थान म्हाजन आनी भंडारी समजाच्या बसकेंत चार थाराव मानून घेतले. कागाळी फाटीं घेवच्यो न्हय. पालखी प्रकरणात गुन्यांव नोंद करचे, रुद्रेश्वर मंदीर फकत भंडारी समाजाचें, समिती परवानगी दिता तो मेरेन हेर समाजाक खंयच्याय विधीचो अधिकार आसचो ना, भंडारी समाजांतल्या व्क्तींक नवे म्हाजन म्हणून नोंद करून घेवचे आनी उपजिल्होधिकाऱ्यान बसकेचें तयार केल्लें इतिवृत्त रद्द करचे अशी मागणी करपी चार थाराव बसकेंत पास केले.
रुद्रेश्वर मंदिरांत पालखी उत्सवा खातीर गोंयांतल्यान सुमार अडेज हजार भंडारी भाविक आयिल्ले. तेन्ना सुमार 25 जाणांच्या जमावान खिळे लायिल्ले दांडे घेवन थंय दहशत दाखयली. पुलिसांचेर आनी हेर भाविकांचेर फातर शेवटीले, बायलां कडेन गैर वेव्हार केलो. ताकां विचारांत घेनासतना फकत एका दिसांत देवस्थान समितीन व्हो वाद मिटयलो अशें जावपाकूच शकना. आयज हें मानून घेतल्यार फाल्यां गोंयांतल्या हेर देवळांनी लेगीत अशे प्रकार घडपाक शकतात अशें पालेकार हांचे म्हणणे आसा.
वाद जाल्या उपरांत मंदीर समितीन राजकी हस्तक्षेप आसपाची शक्यताय उक्तायल्ली. वाद उप्रासून काडपी सातेरकार समितीन लेगीत आमी आपबळग्यार हक्का खातीर झुजतात अशें स्पश्ट केल्लें. उपरांत दिवचलचो उपजिल्होधिकारी एक साजगी सुवातेंत बसका घेवन व्हो वाद मिटयतात हें आमकां मान्य ना. व्हो प्रकार लोकसभा वेंचणुकेंत म्हारग पडपाक शकता हें कळून आयल्या उपरांत कांय राजकी फुडाऱ्यांनी हस्तक्षेप करून वाद मिटोवपाक लायला. मात समितीन व्हो वाद कसो मिटलो हाची जाप गोंयांतल्या भंडारी समाजाच्या सगल्या लोकांक दिवपाची गरज आसा अशें पालेकार हांणी सांगलें.
कौशल हांका दिल्लीं धाडात
पुलीस अधिक्षक अक्षय कौशल हांणीच पालखे वेळार गोंदोळ घालपी लोकांक रुद्रेश्वराच्या देवळांत हाडल्लें अशें सागून वाद जाल्या उपरांत सुमार अर्द वर ते घडणुचे सुवाते वयल्यान गायब जाल्ले. अशा पुलीस अधिकाऱ्याक परत दिल्लीत धाडपाची मागणी अमित पालेकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
