रुचीक साहित्याचें ‘करबट’

भांगरभूंय | प्रतिनिधी

ह्या सगल्या काणयांचो आनी गजालींचो मनीसपणा कडेन सामको लागींचो संबंद आसा. बरोवप्यान आपली विनोदबुद्धी वापरून बरयल्ले हे सगळे खीण वाचतल्याक काचकुल्यो केले बगर रावनात.

म्हाकां ल्हानपणा सावन वाचपाची आवड. ल्हान आसतना जादूची अंगठी, जादूची राजकन्या सारकीं पुस्तकां वाचतां वाचतां धावी यत्तेक पावलें आनी फडके, इनामदार, कदम, सावंत, विश्वास पाटील, रणजित देसाई हांच्या सारक्या नामनेच्या बरवप्यांचीं पुस्तकां वाचून काडलीं. फुडल्या शिक्षणा खातीर मडगांव रांवंक येतकच आनी नोकरेक लागतकच खूब पुस्तकां वाचून काडलीं आनी म्हाकां वाचक पुरस्कार फावो जालो. हालींसराक जापसालदारकी वाडत गेली तशें वाचप उणें जायत गेलें.

पयरच संदीप सगुण नायक हाचें “करबट” हें पुस्तक वाचूंक घेतलें आनीं केन्ना काय तें अख्खें वाचून काबार करतां अशें म्हाका जालें. जें पुस्तक म्हाकां आवडटा तें टिव्ही, मोबायल फोन विसरून हांव वाचून पुराय करतांच. ही म्हजी संवंय. खऱ्यांनींच “करबट” वाचूंक हातांत घेतलें जाल्यार पुराय जाले बगर सकल दवरप कठीण.

बाजारांत मोठें नुसतें मेळना तेन्ना करबट ह्या बारीक सारीक नुस्त्याक खासा करून पावसा दिसांनी अदीक मागणी आसता. करबट म्हळ्यार तरेतरेचें बारीक सारीक नुस्तें. करबटाचें हुमण आनीं सुकें वा धबधबीत तर खूबच रुचीक जाता. करबटाचें आनीक एक खाशेलेंपण म्हळ्यार, तें काट्यां सकट चाबून खावप. कांय जाण तें उजरायनासतना तशातशेंच शिजयतात. लोक तें घोस्तान खातात. खास करून गोंयकारांचें हें घोस्ताचें. तेच भशेन खरो कोंकणी वाचपी हें पुस्तक घोस्तानच वाचतलो अशें हें पुस्तक आसा म्हळ्यार चुकीचें थारचें ना हें सेर्त.

पुस्तकांत साहजिकच तरेकवार काणयो आसात. हातूंतली “रवळूलीं नाडेपेन्ना” ही काणी वाचतकच वा वाचतना तुमकां तुमच्या गांवांतल्या एखाद्या रवळूची याद आयले बगर रावचीच ना. रवळून केल्लीं नाडपेन्नां,  तीं तो कशीं निस्तरायता आनीं तातुंतल्यान तो सालवार जावप शक्यच ना. हें ना जाल्यार तें. स्कुटर ना जाल्यार स्कुटरीचो टायर चलयत घेवन वचपी रवळू तुमची मनरिजवण केले बगर रावचोच ना.

साळवलेंचें उदक, भिकारो, चीट ह्यो काणयो आमकां ऐंशीं ते णव्वदाच्या काळांत व्हरून पावयता. तेन्ना काडिल्ले ते त्रास त्यो अडचणी, तीं संकटां, ते हाल, ती पोस्टमनाची वाट पळवप ह्यो सगल्यो गजाली आमच्या दोळ्यां मुखार एखाद्या चित्रपटा भशेन दोळ्यां फुडल्यान सरकत वतात. ह्या सगल्या काणयांचो आनी गजालींचो मनीसपणा कडेन सामको लागींचो संबंद आसा. बरोवप्यान आपली विनोदबुद्धी वापरून बरयल्ले हे सगळे खीण वाचतल्याक काचकुल्यो केले बगर रावनात.

पुस्तकांतल्या रुचिक “करबटांतलें” एक करबट म्हळ्यार “रेल्वेंतली एक झेम” म्हाका आवडलें. रेल्वे वा भौशीक बसींतल्या प्रवासांत झेम लागतकच आमची कशी फसगत जाता हें तुमीं आमीं जायते फावटी अणभवलां आसतलेंच, हातूंत दुबाव ना. आज जरी हे सगळे खीण इतिहासात जमा जाल्ले आसले तरी ते आतांच आमच्या दोळ्यां मुखार घडटात कशे दिसतात. बरवप्याच्या शैलीची ही करामत आसता.

वाचतल्यांपैकी जायते जाण एखाद्या अपघातांत सापडल्या आसतलेच. कांय अपघात आंगांक मातशें झरकटपाचेर निभावतात तर कांय अपघात दोळ्यां मुखार प्रत्यक्ष मरण दाखयतात. अशा अपघाताची याद येतकच आंगार काटो उबो रावतलोच. बरोवपी अपघातांत मरणा धडेंतल्यान कसो सालवार जालो ही गजाल ” ड्रामा इन रीयल लायफ ” ही घडणूक आमच्या मुखार दवरतना बरवपी तें चित्र जितें कशें दोळ्यां मुखार हाडटा. मनशान उदका कडेन खेळ करूंक जायना हो संदेश खासा करून आयच्या तरनाट्यां खातीर आसा. हालींसाराक उदकाचे घसघशे आनी तळ्यांक भेट दिवन मजा करपी आनीं उदका कडेन खेळ करून सेल्फी घेवपाचो जिवघेणो प्रकार करपी आयचे तरनाटे पिळगेक ही एक शिटकावणी थारूंक शकतली. आजकाल अशें तरेन आपलो जीव वगडायल्ल्या भुरग्यांच्यो गजाली कानार येत असतात.

“करबट” बरवपी संदीप म्हज्या व्हडल्या देरालो पूत. तो काडी पैलवान न्हीं आनीं पैलवानय न्हीं. काॅलेजींत शिकतना ताणें केल्ल्या रगतदानाची तो आजय याद काडटा. आयज तो तें पुण्यकर्म करताच. ही गजाल वाचतल्याक रगतदानाचें म्हत्व कळटलें. आपणें बी हें कार्य करचें अशें वाचतल्याक दिसतलेंच. अशेतरेचे कांय बरे विचार बरवपी कुशळतायेन मांडटा.  “मनीसपण ” ही काणीय  बी देख दिणी काणी.  मनीसपणाची आयच्या काळाक  खूब गरज आसा.

सैम भोवंडी ह्या काणयेंत  सैमाचें बरें वर्णन केलां. तें वाचतकच लेखक सैमाचो मोगी म्हण समजून येता. इंजिनियर आसलो तरी ताचें मन ” सैम मोगी” आशिल्ल्यान, बरो चित्रकार, छायाचित्रकार म्हण तो नामना  हाचे फुडेंय मेळोंवक शकता.

सांगपाचें सार म्हळ्यार कोकणी साहित्याच्या जेवणावळीक हें करबटाचें  हुमण सुवादिक जातलेंच हातूंत दुबाव ना.  तुमकां कोणाकुय ह्या करबटाचो ‘वाटो’ जाय जाल्यार तुमी  9921897029 ह्या मोबायल नंबराचेर  संपर्क सादूं येता. करबट तुमकां घरपोच मेळटलें.  मजा म्हळ्यार हें “करबट” शुद्ध शाकाहारी (शिवराक) आसा आनी हाचो आस्वाद श्रावण म्हयन्यांत लेगीत घेवं येता.

(लेखिका मुख्याध्यापिका आसात.)

सौ सरोजा रंजन नायक 

9158396630