भांगरभूंय | प्रतिनिधी
बंगळूरु, खबरां संस्थाः संवसारभरांत ‘रुखा आवय’ ह्या नांवान वळख आशिल्ली ज्येश्ठ सैम वावुरपी सालूमरदा थिमक्का (114) काल रातीं संवसाराक अंतरली. बेंगळुरूच्या खाजगी हॉस्पिटलांत तिणें निमाणो स्वास घेतलो. भलायकी बरी नाशिल्ल्यान तांचेर उपचार सुरू आशिल्ले.
‘सालूमरदा’ नांवाची काणी
30 जून 1911 दिसा जल्मल्ल्या थिमक्का हिणें आपल्या वावराक लागून आनी झाडां रोवपाच्या मोहिमेक लागून ‘सालूमरदा’ ही पदवी मेळयली. कर्नाटकांतल्या रामनगर जिल्ह्यांतल्या हुलिकल ते कुदूर मेरेनच्या 4.5 किमी लांबायेच्या रस्त्यार 385 वड लायले आनी विशेश गजाल म्हणल्यार योग्य जतनाय घेवन ते वाडयले. औपचारीक शिक्षण नासून लेगीत तिणें सैमा कडेन अखंड नातें तिगोवन दवरलें आनी आपल्या जिवितांत 8,000 परस चड झाडां लायलीं आनी वाडयली.
थिमक्का आनी तिचो घरकान्न हांकां भुरगी नाशिल्ली. आपल्याक भुरगीं नाशिल्ल्या जिविताचे रिकामेपण भरपा खातीर तांणी झाडां लावन तांकां पोसपाचें थारायलें. वतांत, पावसांत आनी उदकाच्या उणावांत लेगीत दरेका झाडाची ती जतनाय घेताली. तांच्या निस्वार्थी हरित क्रांतींतल्यान देशांतल्या पर्यावरण संवर्धन चळवळींक नवी दिका मेळ्ळी आनी संवसारीक पांवड्यार तांच्या वावराची तोखणाय जाली.
आयुश्यभर पर्यावरण संवर्धन खातीर निस्वार्थीपणान वावुरपी थिमक्का हांकां तांच्या ह्या वावराक लागून जायते मानाचे पुरस्कार मेळ्ळ्यात. तांचो पद्मश्री (2019) ह्या सर्वोच्च नागरी पुरस्कारान भोवमान जालो. हाचे भायर तांकां हम्पी विद्यापिठाचो नाडोजा पुरस्कार (2010), नॅशनल सिटिझन अवॉर्ड(1995) आनी इंदिरा प्रियदर्शिनी वृक्षमित्र पुरस्कार (1997) अशे जायते राश्ट्रीय भोवमान मेळ्ळ्यात.
मुख्यमंत्र्यांन दुख्ख उक्तायलें
कर्नाटकाचे मुख्यमंत्री सिद्धरामय्या हांणी थिमक्का हांच्या मरणा विशीं दुख्ख उक्तायलें. ताणें ‘एक्स’ (ट्विटर) ह्या संकेतथळार बरयलें, “रुखा आवय सालुमरादा थिमक्क हांच्या मरणाची खबर आयकून खोलायेन दुख्ख जालें. तिच्या आत्म्याक शांती मेळूं. पर्यावरण संवर्धनाक आपलें जिवीत ओंपिल्ल्या हे म्हान व्यक्तीक आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
