भांगरभूंय | प्रतिनिधी
गुवाहाटी, खबरां संस्था: आसामच्या हैलाकांडी जिल्ह्यांत एके व्यक्तीन ताचे वेल्यान वचपी ट्रेनीचो व्हिडिओ केलो आनी तो सोशल मिडियाचेर अपलोड केला. व्हिडिओ व्हायरल जाले उपरांत पुलिसांनी ताका ८ एप्रिलाक अटक केली. आरोपीचें नांव पापुल आलोम बरभुईया (२७) अशें आसा.
पुलिसांनी सांगिल्ले प्रमाण, ३१ सेकंदांचो हो व्हिडिओ ह्या सप्तकाचे सुरवातेक फेसबुकाचेर अपलोड केल्लो. पापुलान दुसर्या दिसा दुसरो व्हिडिओ पोस्ट केलो आनी म्हणलें, फाटलो व्हिडिओ एडिट केला. ट्रेनीच्या वचपाचो भाग इंटरनेटावेल्यान डावनलोड केल्लो.
दुसर्या व्हिडिओंत स्टंट करचो न्हय असो सल्लो दिला. व्हिडिओंत तो रेल्वे रुळां मदींच सरळ पडिल्लो दिसता. ताच्या हातांत मोबायल आसा. लागींच उबो आशिल्लो पापुलचो इश्टूय ताच्या मोबायलाचेर व्हिडियो रेकॉर्ड करता. कांय वेळार पापुलावेल्यान एक ट्रेन वचपाक लागता.
मजगतीं, ट्रॅका मदीं न्हिदिल्लो पापुल व्हिडिओ रेकॉर्ड करीत रावता. ताचो वांगडीय पुराय घडणूक रेकॉर्ड करता. ट्रेन गेले उपरांत, पापुल उबो रावता आनी ताच्या वांगड्याच्या कॅमेर्या कडेन हात दाखयता.
पुलिसांनी सांगलें, अटक केले उपरांत पापुलाक न्यायालयांत हजर केलो, जंय ताका जामीन मेळ्ळो. ह्या प्रकरणाची चवकशी सुरू आसा. पापुलान ताच्या सोशल मीडिया प्रोफायलींत स्वताचें वर्णन व्हिडिओ गेम प्रोग्रामर म्हणून केलां. तो बंगळुरूंत रावता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
