भांगरभूंय | प्रतिनिधी
20 वर्सांनी 20 लाखांच्या रिणाचेर सुमार रु. 74 हजारांचो फायदो
नवी दिल्ली, खबरां संस्था: येवपी काळांत रीण सवाय जातले. सध्याचे ईएमआय उणें जातलें. आरबीआयन रेपो रेट ०.२५ टक्क्यांनी उणो करून ५.२५ टक्क्यांनी केला. उणो करपाचो हो निर्णय ३ ते ५ डिसेंबर ह्या काळांत जाल्ले चलन धोरण समितीचे बसकेंत घेतला. आरबीआयचे राज्यपाल संजय मल्होत्रा हांणी ५ डिसेंबराक ही म्हायती दिली.
भारतीय रिझर्व्ह बँक म्हळ्यार आरबीआय बँकेक ज्या दरान रीण दिता ताका रेपो दर म्हणटात. आरबीआय जेन्ना रेपो रेट उणो करता तेन्ना बँकांक सवाय रीण मेळटा आनी हो फायदो गिरायकां मेरेन पावयतात. म्हणल्यार येवपी काळांत घर आनी ऑटो सारकिल्लें रीण ०.२५ टक्क्यां मेरेन सवाय जातलें.
ताज्या कपाती उपरांत २० वर्सांच्या रु. २० लाखांच्या रिणाचेर इएमआय ३१० रुपयां मेरेन उणें जातलें. तेच प्रमाण रु. ३० लाखांच्या रिणांचेर इएमआय ४६५ रुपयां मेरेन उणें जातलें. नव्या आनी सध्याच्या दोनूय गिरायकांक हाचो फायदो मेळटलो.
रेपो रेट अंदूं ४ फावटीं कापलो, १.२५% न कपात
फेब्रुवारींत जाल्ले बसकेंत रिझर्व्ह बँकेन व्याजदर ६.५ टक्क्यांं वयल्यान ६.२५ टक्क्यांनी उणो केल्लो. हो उणाव चलन धोरण समितीन सुमार ५ वर्सां उपरांत केल्लो.
तशेंच एप्रीलांत जाल्ले दुसरे बसकेंत व्याजदर ०.२५ टक्क्यांनी उणो केल्लो. जुनांत तिसरे खेपे दर ०.५० टक्क्यांनी उणें जालें. आतां परतून ०.२५% उणें जालां. म्हणल्यार चलन धोरण समितीन तीन पटींनी १.२५ टक्क्यांनी व्याजदर उणो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
