भांगरभूंय | प्रतिनिधी
नवी दिल्ली, खबरां संस्था ः आतां गाडी, वैयक्तिक वा होम लोन आदी रीण घेवपा खातीर बँकांनी वचपाची गरज ना. फकत एका क्लिकांचेर रीण मेळटलें. ताची प्रक्रिया यूपीआय सारकीच कांय सेकंदाची आसतली. हे खातीर आरबीआयचे गव्हर्नर शक्तिकांत दास हांणी सोमारा युनिफायड लँडींग इंटरफेस (यूएलआय) सुरू करपाची घोशणा केल्या. हाका लागून देशांतल्या रीण वेवस्थेंत नवी क्रांती येतली अशें तांणी सांगलें.
यूएलआय म्हणल्यार कितें?
आरबीआय यूपीआय सारकी नवी पद्दत सुरू करता, जाका लागून वापरप्यांक ऑनलायन रीण घेवपाक सोंपें जातलें. फोनपे, गूगलपे, पेटीएम सारकिल्ले ॲप्स यूपीआयचेर आदारीत आसात, जाचेर नॅशनल पेमेंट कॉर्पोरेशन ऑफ इंडिया निरिक्षण करता. होच प्लॅटफॉर्म यूएलआय प्रदान करतले.
कशें काम करतलें?
ई- केवायसी आधार, जमनीचे नोंदी, पॅन प्रमाणीकरण, बँको, क्रेडिट कंपन्यां सारकिल्ल्या वेगवेगळ्या स्त्रोतां वयल्यान डेटा एकठांय करतले. हाचे वरवीं अर्जदाराच्या रीण क्षमतायेचे मुल्यांकन करतले. ही पुराय वेवस्था संमतीच्या आदाराचेर काम करतली. ताका लागून डेटा गुप्त उरतलो.
फायदो कितें जातलो?
रिण दिवपी सध्याच्या अॅपांचेर सरकार, आरबीआयचें मर्यादीत नियंत्रण आसा. पूण यूएलआय आदारीत अॅप थेट देखरेखी खाला येतले. आतां जशें तुमी तुमचो पिन घालून रोखडोच पेमेंट करतात, तशें तुमी तुमचो पिन घालून रीण घेवंक मेळटलें.
ह्या निर्णयाक लागून युएलआय रिणाची प्रक्रिया पुरायपणान ऑनलायन करतले. हाका लागून पारदर्शकताये वांगडाच खूब वेळ वाचतलो अशें बँकबाजारचे सीईओ आदिल शेट्टी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
