भांगरभूंय | प्रतिनिधी
नवी दिल्ली, खबरां संस्था: भारतीय रिझर्व्ह बँकेच्या स वांगड्याचे चलन धोरण समितीन ९ एप्रीलाक केल्ल्या धोरणात्मक नियाळांत रेपो दर २५ बेसिस पॉयंट (बीपीएस) उणो करून ६ टक्क्यांनी उणो करपाचो निर्णय घेतला. हाका लागून फुडल्या दिसांनी घर, वैयक्तीक, ऑटो आनी डिपॉझिटांचेर व्याजदर उणें जातलें. दर थारावपी पॅनेलान आपली चलन धोरणाची भुमिका तटस्थांतल्यान अनुकूल अशे स्थितींत बदलिल्ल्यान रेपो दर कापलो.
एमपीसीन २०२५-२६ वर्सा जीडीपी वाड ६.७ टक्क्यावेल्यान ६.५ टक्क्यां मेरेन उणो करपाचो निर्णय घेतला. २०२५-२६त किरकोळ म्हारगाय ४ टक्के उरपाची अपेक्षा आशिल्ल्याचें एमपीसीन म्हणलें.
अमेरिकेचे अध्यक्ष डोनाल्ड ट्रम्प हांणी वेपारी शुल्क लादिल्ल्यान संवसारीक बाजारांत अनिश्चितताय वाडल्या. हे फाटभुंयेर स वांगड्यांच्या एमपीसीन हो निर्णय घेतलो. कर दर चड जाल्यार चलनवाड, वेपारी तणाव वाडटलो आनी संवसारीक अर्थवेवस्थेंत मंदी येतली असो भंय आशिल्ल्यान दर उणो केला.
आरबीआयच्या गव्हर्नरांनी कितें म्हणलें?
संवसारीक अर्थीक नदर नेटान बदलत आसा, वित्तीय वर्स २०२६ ची सुरवात चिंतेची जाल्या आनी कांय जागतीक वेपारी संघर्श येवपाक लागल्यात, अशें आरबीआयचे गव्हर्नर संजय मल्होत्रा हांणी सांगलें. आरबीआयचे चलन धोरण समितीन सेगीत दुसरे खेपे रेपो दरांत २५ बेसिस पॉयंट कापला. फेब्रुवारीच्या चलन धोरणांत एमपीसीन सुमार पांच वर्सांत पयलेच खेपे रेपो दर २५ बेसीस पॉयंटांनी कापून ६.२५ टक्क्यांनी केल्लो. चलनवाड देंवपाची आनी वाड मंद जावपाचो हुस्को आशिल्ल्यान हो निर्णय घेतला.
जानेवारी- फेब्रुवारी ह्या काळांत सरासरी ३.९ टक्क्यांनी चलनवाड जाली. ही सरासरी जानेवारी-मार्च २०२५ खातीर रिझर्व्ह बँकेच्या तिमाही अदमासा परस उणी आसा. वित्तीय वर्स २०२५ च्या चवथ्या तिमाहींत गिरायक दराचेर आदारीत चलनवाडी (सीपीआय) ४.८ टक्क्यांनी आसतली असो अदमास रिझर्व्ह बँकेन उक्तायला.
व्याजदराचेर कसो परिणाम जातलो?
रेपो दर २५ बेसीस पॉयंटांनी कापून ६ टक्क्यांनी केल्ल्यान ताचे कडेन संबंदीत आशिल्ले सगळे बाह्य बेंचमार्क रिणाचें दर (ईबीएलआर) त्याच मार्जिनान उणे केल्यात. हो निर्णय रिणां घेवप्यांक सुटका दितलो, कारण घर आनी वयक्तीक रिणांचेर तांचे समीकरण म्हयन्याळे हप्ते (ईएमआय) २५ बेसीस पॉयंट उणे जातले. फेब्रुवारीच्या धोरणांत पॉलिसी रेपो दरांत २५ बेसिस पॉयंट कापल्या उपरांत बँकांनी रेपो-लिंक केल्ले भायल्या बेंचमार्क आदारीत रिणाचे दर अश्याच प्रमाणांत उणे केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
