‘रिव्हर्स करंट’ समस्या

भांगरभूंय | प्रतिनिधी

लोक इन्व्हर्टर कित्याक घेतात, ह्या प्रस्नाची जाप कोणूय दितलो. गोंयांत लायट आपालिपा खेळटा म्हणून.

होंडा मे म्हयन्यांत शाॅक लागून लायनमॅनाक मरण आयिल्लें. जनरेटराचो रिव्हर्स करंट हें ताच्या मरणा फाटलें एक कारण. वीज खात्याचोच अहवाल तशें सांगता. हाचे पयलींय शाॅक लागपाच्यो घडणुको घडल्यात. 1970 च्या दसकांत पसून. मात, जनरेटर आनी इन्व्हर्टर हालींचे. म्हणटकच फाटल्या कांय वर्सांनीच तांचो रिव्हर्स करंट लागून लायनमॅन संवसाराक अंतरल्यात. आतां दरेका घरांत इन्व्हर्टर आसता आनी व्हडल्या आस्थापनांनी जनरेटर. पोरूं 19 एप्रीलाक दिवचले मनोज जांबावलीकारांक खांब्यार मरण आयिल्लें. 25 नोव्हेंबर 2023 दिसा शिवोले कृष्णा परवार संवसाराक अंतरिल्ले. 4 जून 2024 क कुट्टे ट्रान्स्फाॅरमराचेर काम करतना सिद्धेश नायक जखमी जाल्ले. अंदूं 20 मेक चंद्रू गांवकार. तांचे वांगडीय ह्या अपघातांत जखमी जाल्यात. 3- 4 वर्सां भितर पांच लायनमॅनांनी संवसार सोडला. सगले तरणाटे. जांबावलीकाराक मरण आयिल्लें तेन्ना इन्व्हर्टर वापरप्यांक सुरक्षा उपाय घेवचे पडटले अशें जाहीर जाल्लें. हो नेम चालीक लागलो?? जनरेटर वा इन्व्हर्टर कनेक्शन घेतना अधिकृत इलेक्ट्रिकल कंपनीं कडल्यानूच घेवचें, ट्रान्सफर स्वीच, पोल सॅपरेटर हीं उपकरणां घेवपाची सक्ती केल्ली. तिचें कितें जालें? कारण एक वर्सा उपरांत होंडा गांवांत दिवचले प्रमाणूच लायनमॅनाक मरण आयिल्लें. नेम चालीक लागल्यात, अशें वीज खातें सांगता. तांणी तशी पळोवणी केल्या बी?
लायनमॅनाक ग्लावज, गमबूट, शिडी, अर्थींग वायर आनी हेर उपकरणां दिल्यांत, अशें खात्यान जाहीर केलां. मात तरीय हाता- पायांत कांयच घालिनासतना लायनमॅन काम करतना दिसतात. हीं कामां कंत्राटाचेर बी दिवंक ना मूं? दुरुस्ती वेळार लायट बंद करतात. मात, घरां, आस्थापनांतलो जनरेटर, इन्व्हर्टर चालू आसता. ट्रान्सफर स्वीच, आयसोलेटर, पोल डिस्कनेक्टर नासत जाल्यार हो करंट भायले मुख्य लायनींत वता. केन्ना तो उणो आसता, केन्ना आक्ताक मरण येवं येता. कांय जनरेटर वीज स्वताच बंद करतात. ती खांब्याचेर वचना. हें स्विचिंग जालें काय दोनूय करंट एकाच वेळार एकाच वायरिंगांत वचपाक शकनात. हे स्वीच हातान घुंवडावन वीज खंयची घेवची तें थारावंक मेळटा. कांय ट्रान्सफर स्वीच स्वता आपूणच हें काम करतात. म्हणजे आपोआप जनरेटर सुरू जाता आनी कनेक्शन बदलता. एकाच वेळार थ्री फेस बंद करपाची ताची तांक आसता. जर स्वीच आनी हेर उपकरणां वापरूंक नात आनी लायट वतकच जनरेटर, इन्व्हर्टर सुरू जालो जाल्यार करंट सरळ खांब्या वयल्या सरयांनी वता. म्हणटकच हो प्रकार कितलो भिरांकूळ हाची कल्पना करची. गोंयांत ताचे परिणाम दिसल्यात. साद्या घराक उणे तांकीचीं उपकरणां, स्वीच चलतात. मात पंप, एसी बी इन्व्हर्टराक जोडिल्ले आसल्यार व्हडलोच स्वीच, उच्च दर्जाचीं सगलीं उपकरणां घेवपाक जाय. इन्व्हर्टरुय बरो जाय.
लोक इन्व्हर्टर कित्याक घेतात, ह्या प्रस्नाची जाप कोणूय दितलो. गोंयांत लायट आपालिपा खेळटा म्हणून. कांय गांवांनी तर सांजवेळा गेल्ली लायट दुसरे दीस सकाळीं येता. संबंदीत कुटुंबां सोडलीं जाल्यार हेर लोकांक तें खबर आसताच अशें ना. म्हणून वीज खात्याची धांपिल्ली मूठ सवाय लाखाचीच उरता. आतां तमनार कंपनीन वीज पुरवणेचें जाळें विणलां, उपकेंद्रां सुरू केल्यांत, म्हणटकच लायटीची तशी समस्या येवची ना. न्हय येवंक जायना. कारण लायटीचे दरूय वाडल्यात. सगल्यांक 24 वरां लायट मेळूंक जाय. कोणा कडेन जनरेटर, इन्व्हर्टर आसात, ताची नोंद वीज खात्या कडेन आसा? ताचे वांगडा गरजेचीं उपकरणां आसात काय नात, करंट खांब्या वयल्या सरयांनी वता काय ना, हाची पळोवणी जावंक जाय. रिव्हर्स करंटाची ही समस्या सासणाची सोंपची. आनीक मरणां नाकात.