भांगरभूंय | प्रतिनिधी
जैसलमेर, खबरां संस्था ः सध्याच्या युगांत रिल्स करून तीं इन्स्टा वा फेसबुकाचेर घालपाचें पिशें वा व्यसन जायत्या जाणांक लागलां. पूण तीं कशीं आनी कशें पद्दतीन करतात हेंय तितलेंच म्हत्वाचें. जैसलमेरच्या सांगड पुलीस स्टेशनाच्या वाठारांत देवीकोट शारा लागसार निश्काळजीपणान कार चलयत हातांत सोऱ्याचे ग्लास घेवन नाचत रिल करपी तरणाट्यांनी एके आवय आनी भुरग्याक जिवेशीं मारले. इतलेंच न्हय तर गाडयेंतल्या दोग तरणाट्यांकय मरण आयलें.
सोशल मिडिया खातीर रिल तयार करपाक हातांत सोऱ्याचे ग्लास घेवन संगीत लावन चलते गाडयेंत नाचतालें. ह्या वेळार हो अपघात जालो. तातूंत रस्त्या कुशीक डाळबां विकत घेवपी आवय- पुताक गाडयेन धपको दिलो आनी तांकां थंयच मरण आयलें. जाल्यार गाडयेंतल्या दोगांक उपचारा वेळार मरण आयलें.
पुलीस अधीक्षक विकास सांगवान हांणी दिल्ले म्हायती प्रमाण, शुक्रारा रातीं 8:30 वरांचेर हो अपघात जालो. जैसलमेरच्या अकाल गांवांतल्यान धव्या रंगाची कार बारमेरच्या वटेन वेगान वताली. देवीकोट चौका मुखार पुलिसांनी ती आडावपाचो यत्न केलो. पूण कारीतल्या तरणाट्यांनी पुलिसांक टाळून बारमेरच्या वटेन कार धोफरायली. त्या वेळार कारीचो वेग वराक 130 किमी आशिल्लो.
देवीकोट शाराच्या मुखेल रस्त्यार व्हड वेगान वचपी कारीन थंय उबे आशिल्ल्या पिकअपाक धपको दिलो. तातूंत डाळबां विकताले. लागसार उबे रावून तीं विकत घेवपी मेनका भीम बहादुर (34) आनी तिचो पूत मनीष (11) हांकां गाडयेन चिड्डिले. तांकां 20 फूट फुडें ओडीत व्हेले. दोगांयकूय मरण आयलें. तीं नेपाळांत रावपी. ३ वर्सां आदीं ती ह्या शारांत आयिल्ली. ह्या अपघातांत कारीतले सगले तरणाटे गंभीर जखमी जाल्यात. तांकां आनी मरण आयिल्ल्यांक जेलसमेर जवाहीर हॉस्पिटल व्हेले. गाडयेंतल्या जखमी जाल्ल्या रोशन खान (21, अकाल) आनी भवानी सिंह (अकाल) हांकां उपचारा वेळार मरण आयलें. राजू सिंग सिसोदिया आनी लीलू सिंह चौहान हांचेर उपचार चालू आसात.
अपघाताच्या कांय वेळा पयलीं कारींतल्या तरणाट्यांनी भितर बसून सोरो पियेलो आनी ताचो व्हिडियोय केलो. हो व्हिडियो तयार केल्ल्या तरणाट्यान ताच्या सोशल मिडिया खात्याचेरय तो अपलोड केल्लो. पूण कांय खिणा भितर व्हिडियो तयार करपी रोशनाक अपघातांत मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
