भांगरभूंय | प्रतिनिधी
भांगरभूंय । खबरां मेज
पणजीः रिलायन्स फावंडेशनाचो भारतांतलो पयलोच ‘वंतारा’ व्हो प्राणी संवर्धन, पुनर्वसणूक आनी उपचार प्रकल्प गुजरांतांत जामनगर हांगा 3 हजार एकर वाठारांतल्या कृत्रिम रानांत साकारतलो. थंय वाटावल्ल्या प्राणी प्रजातींची वाड करपा खातीर सैमीक, समृद्ध इको- सिस्टम तयार केल्या. अनंत अंबानी हाच्या संकल्पनेतलो व्हो प्रकल्प आसा.
वंतारा इनिशिएटीव्ह व्हो देशांतलो अशे तरेचो पयलोच उपक्रम आसा. जनावरांची जतनाय आनी कल्याण करपाच्या हेतान तो सुरू केला. प्राण्याचें संवर्धन, पुनर्वसणूक आनी देखभाल करपाक म्हत्वाचे योगदान दिवपा खातीर जज्ज्ञ ह्या उपक्रमांत वांटेकार जावपाक शकतात अशें रिलायन्स बोर्डाचे संचालक अनंत अंबानी हाणे सांगलें. प्राण्याचें संवर्धन, संशोधन आनी उपचार हाचेर वंतारा वरवीं भर दितले. ते खातीर संवसारीक दर्जाची यंत्रणा आनी संवसारांतल्या ह्या मळा वयल्या तज्ज्ञांक जोडपा खातीर फुडाकार घेतले अशें अंबानी हाणे सांगलें.
फाटल्या कांय वर्सांत ह्या उपक्रमा वरवीं दोनशें परस चड हती आनी हेर हजारांनी प्राणी आनी शेवण्याक असुरक्षीत परिस्थितींतल्यान वाटयल्यात, गेंडो, बिबटे, मानगी हाची पुनर्वसणूक केल्या. वतांरान हालींच मेक्सिको सारक्या देशांत प्राणी बचाव मोहिमेंत वांटो घेतिल्लो अशी म्हायती ताणे दिली. वंतारा हे आपले खातीर पॅशन जालां. धोक्यांत आशिल्ल्या प्रजातीची राखण करपा कडेन आमी लक्ष केंद्रीत केलां अशेंय ताणे सांगलें. भारतांतली नामनेची आंतरराष्ट्रीय विद्यापिठा आनी युनियन फॉर कन्झर्वेशन ऑफ नेचर (आययूसीएन) आनी संवसारीक रानाजीव निधी (डब्ल्यूडब्ल्यूएफ) ह्या सारक्यो आंतरराष्ट्रीय संस्थानी ह्या उपक्रमांत वांटेकार जावपाची तयारी दाखयल्या अशें अंबानी हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
