भांगरभूंय | प्रतिनिधी
नवी दिल्ली, खबरां संस्था ः रिलायन्स इंडस्ट्रीन 7 मेक “ऑपरेशन सिंदूर” खातीर ट्रेडमार्क अर्ज दाखल केला. हो अर्ज 41 वर्गा खाला दाखल केला. म्हळ्यार ट्रेडमार्क मेळ्ळे उपरांत फकत रिलायन्साक मनरिजवण आनी सांस्कृतीक कार्यावळी खातीर हो शब्द वापरूंक मेळटलो.
भारतान पाकिस्तानांतल्या 7 शारांतल्या 9 आतंकवादी तळांचेर मध्यान रातीं 1 वरांचेर हवाई हल्लो केल्लो तेच दिसा हो अर्ज केल्लो. पाकिस्तानाचेर जाल्ल्या ह्या हल्ल्याक तिनूय सैन्यानी संयुक्तपणान ‘ऑपरेशन सिंदूर’ अशें नांव दिलां.
रिलायन्स सोडल्यार मुकेश चेतरम अग्रवाल, ग्रुप कॅप्टन कमल सिंग ओबर (निवृत्त) आनी आलोक कोठारी हांणीय “ऑपरेशन सिंदूर” ट्रेडमार्क खातीर अर्ज केला.
अर्जांची तपासणी केले उपरांत ट्रेडमार्क दितले
भारतीय ट्रेडमार्क रजिस्ट्री आतां अर्जांची तपासणी करतली. हे प्रक्रियेक कांय वेळ लागूं येता. मान्यताय मेळ्ळी जाल्यार, रिलायन्साक विशिश्ट वर्गांत “ऑपरेशन सिंदूर” वापरपाचे विशेश अधिकार मेळटले. एकाच शब्द चिन्ना खातीर जायते अर्ज केल्यार नोंदणी पयल्या दाखल केल्ल्या अर्जाक वा चड सिद्ध दाव्याक प्राधान्य दितली अशें कायदेशीर तज्ञ म्हणटात.
रिलायन्स लश्करी कारवायां संबंदीत चित्रपट तयार करूंक शकता
ट्रेडमार्क अर्ज केले उपरांत रिलायन्स ताचो वापर लश्करी कारवायां संबंदीत फिल्म, डॉक्युमेंटरी वा संस्कृतीक कार्यावळीं खातीर करतलो असो अदमास आसा. ट्रेडमार्क नोंदणीच्या 41 व्या वर्गांत चित्रपट निर्मिती, कार्यावळी घडोवन हाडप आनी शिक्षणीक कार्यावळी अशो सेवा आसपावीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
