भांगरभूंय | प्रतिनिधी
पणजी : फोंडें पोटवेंचणुके खातीर उमेदवारी अर्ज भरपाच्या निमण्या दिसा फाल्यां, सोमारा भाजपाचे उमेदवार रितेश नायक आनी कॉंग्रेसीचे डॉ. केतन भाटीकार हे उमेदवारी अर्ज दाखल करतले. उमेदवारी अर्ज भरतना गर्दी जावची न्हय म्हूण वेंचणूक आयोगान कांय निर्बंद घातिल्ल्यान उमेदवारांक अर्ज भरतना शक्ती प्रदर्शन करपाक मेळचें ना.
फोंडें मतदारसंघांत पोटवेंचणुके खातीर ९ एप्रिलाक मतदान जातलें आनी ४ मेयाक मतमेजणी जातली. वेंचणूक आयोगा कडल्यान १५ मार्चाक वेंचणुकेची तारीख जाहीर जाल्या, तरी ताचे पयलीं सावन इत्सुकांनी प्रचाराक सुरवात केल्ली. भाजपाचे उमेदवार रितेश नायक, कॉंग्रेसीचे डॉ. केतन भाटीकार आनी आपाचे गीतेश नायक हांचो प्रचार नेटान सुरू आसा.
भारतीय जनता पक्षा वतीन उमेदवारी खातीर रितेश नायक आनी विश्वनाथ दळवी हीं दोन नांवां धाडिल्लीं. संवसार पाडव्या दिसा भाजपान रितेश नायक हांकां उमेदवारी जाहीर केली. हाका लागून उमेदवारी खातीर इत्सुक आशिल्ले विश्वनाथ दळवी आनी तांच्या कार्यकर्त्यां मदीं निरशेवणी निर्माण जाली. विश्वनाथ दळवी हे कितें भुमिका घेतात? हे विशी उमळशीक आसा. पक्षाचो हांव निश्टावान कार्यकर्तो. मात उमेदवारी न्हयकारिल्ल्यान म्हाका शॉक बसला अशी प्रतिक्रीया विश्वनाथ दळवी हांणी उक्तायली. मुख्यमंत्री डॉ. प्रमोद सावंत हांचे कडेन हांव उलयतलों आनी थारयतलों, अशें तांणी सांगलें. उमेदवारीविशीं ठोस अशें वक्तव्य करूंक नाशिल्लें म्हूण ते आयज कितें निर्णय घेतात, हे विशी उमळशीक आसा.
आपलो प्रचार नेटान सुरू आसा. कॉंग्रेसीचे पदाधिकारी आनी सगळे कार्यकर्ते म्हजे खातीर वावर करतात, अशें कॉंग्रेसीचे उमेदवार डॉ. केतन भाटीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
