भांगरभूंय | प्रतिनिधी
वीज खात्याची गिरायकांक सुचोवणी
पणजी: वीज खात्यान घरां भितर वा रिडींग घेवप कठीण आशिल्ल्या सुवातां वेले वीज मिटर हालोवपाची सुचोवणी केल्या. हे खातीर गिरायकांक 28 नोव्हेंबर मेरेन निमाणी मुजत दिल्या. गोंयभर अशे सुमार 39 हजार मिटर आसात. निमाणच्या मुजती मेरेन 30 हजार मिटर हालयतले अशी आस्त खात्यान उक्तायल्या. सद्या मिटर हालोवपाचे प्रक्रियेक बरो प्रतिसाद मेळत आशिल्ल्याची म्हायती खात्यांतल्या वरिश्ठ अधिकाऱ्यांनी दिली.
सहजतायेन मिटर रिडींग घेवंक मेळटलें अशे सुवातेर वीज मिटर हालोवपा विशीं खात्या कडेन विचारप जायत आसा. गिरायकांनी स्वता जावन मुखार येवन ही प्रक्रिया समजून घेतात. गैरसमजाक लागून कांय गिरायक हाका विरोध करीत आसात. पूण खात्यान हो निर्णय जोड वीज नियमन प्राधिकरणाच्या नेमां प्रमाण घेतला. खात्याचे कर्मचारी वा कनिश्ठ अभियंतो गिरायकांक प्रक्रिया समजावन सांगत आसात. गिरायकांक हे विशीं म्हायती मेळची हे खातीर आमी दर म्हयन्याक नोटीस उजवाडायतात अशें अधिकाऱ्यांनी सांगलें.
कांय गिरायक गोंयांत स्मार्ट मिटर बसयतले ते खातीर मिटर हालोवपाची गरज नाशिल्ल्याचें सांगतात. पूण स्मार्ट मिटर बसोवपा खातीर अजून वेळ आशिल्ल्यान वीज मिटर सहजतायेन दिसपी सुवातेर आसप गरजेचें आसा. मिटर हालोवपा खातीर सादारपणान 10 हजार रुपया खर्च येता. मिटर हालोवपाचें काम खाजगी इलेक्ट्रीशना कडल्यान करून घेवप गरजेचें आसा. हे खातीर खात्यांतले कर्मचारी मजत करचे नात. खात्यांतले अधिकारी गिरायकांक मिटर खंय लावप हे विशीं सल्लो दिवंक शकतात अशी म्हायती वरिश्ठ अधिकाऱ्यांनी दिली.
मेळिल्ले म्हायती प्रमाण गोंयांत 7.45 लाख घरगुती वीज गिरायक आसात. हातूंतले सुमार 39 हजार गिरायकांचे मिटर घरांत वा सहजतायेन मिटर रिडींग करूंक मेळना अशे सुवातेर बसयल्यात. हातूंतल्या कांय गिरायकांची घरां गोंयांत आसलीं तरी ते सद्या थंय रावनात. घर बंद आशिल्ल्यान वा मिटर भितर आशिल्ल्यान खात्याच्या कर्मचाऱ्यांक रिडींग घेवंक मेळना. अशा वेळार फाटल्या बिलांची सरासरी काडून वीज बील तयार करचें पडटा. हातूंत वीज खात्याचें लुकसाण जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
