भांगरभूंय | प्रतिनिधी
नॅशनल हेरॉल्ड प्रकरणांत कारवाय : राजकी मळार खवदळ नवी दिल्लीः नॅशनल हेराल्ड प्रकरणांत मंगळारा अंमलबजावणी संचालनालयान काँग्रेस फुडारी सोनिया गांधी आनी खासदार राहुल गांधी हांचे आड मनी लॉड्रींग प्रकरणांत आरोपपत्र दाखल केलां. हे कृतीक लागून राजकी मळार खवदळ पडला.
एप्रीलाचे सुरवेक एसोसिएटेड जर्नल्स लिमिटेड (एजेएल) कंपनीची 661 कोटी रुपयांची मालमत्ता ताब्यांत घेवपाची प्रक्रिया ईडीन सुरू केल्ली. हाचे खाला दिल्ली, मुंबय आनी लखनौ हांगाची मालमत्ता ताब्यांत घेवपा खातीर थळाव्या नोंदणी कार्यालयांक नोटीस धाडल्यात.
एजेएल हे दिसाळें आनी डिजिटल मिडिया ‘नॅशनल हेराल्ड’ चलयता आनी ‘यंग इंडियन प्रा. लिमिटेड ताचेर हे कंपनीचें नियंत्रण आसा.
सोनिया आनी राहुल गांधी हांचे कडेन हे कंपनींत दरेकीं 38 टक्के हिस्सो आसात. ‘यंग इंडिया’ कंपनीन एजेएल मेळोवपाचे प्रक्रियेंत अर्थीक गैरवेव्हार जाल्ल्याचो आरोप ईडीन केला.
डॉ. सुब्रमण्यम स्वामी हांच्या कागाळीचेर आदारीत कारवाय
2014 वर्सा भाजपा फुडारी डॉ. सुब्रमण्यम स्वामी हांणी दाखल केल्ले खाजगी कागाळीचेर आदारून ही चवकशी सुरू केल्ली. हे कागाळींत सोनिया गांधी, राहुल गांधी, स. मोतीलाल व्होरा, ऑस्कर फर्नांडीस, सुमन दुबे, सॅम पित्रोदा आनी ‘यंग इंडियन’ कंपनीचेर फक्त 50 लाख रुपयां खातीर 2 हजार कोटी रुपयां परस चड मोलाची मालमत्ता फटवणूक केल्ल्याचो आरोप केला.
ईडी तपासांतले मुखेल मुद्दे
-‘यंग इंडियन’ कंपनीन फकत 50 लाख रुपयां खातीर हजारांनी कोटी ‘एजेएल’ मोलाचीं मालमत्ता आपल्या ताब्यांत घेतली असो आरोप.
-नोव्हेंबर 2023 वर्सा तात्पुरती जप्त केल्ली 661 कोटींची मालमत्ता.
-भाडेकरूं लोकांक जागो रितो करपाचो आदेश. भाडें थेट ईडी कडेन जमा करपाक सांगलें.
ईडीन मनी लॉड्रींग प्रतिबंधक कायद्याच्या कलम 8 आनी नियम 5 (1) खाला ही कारवाय केल्या, आनी जप्त केल्ल्या मालमत्तां प्रत्यक्ष ताब्यांत घेवपाची प्रक्रिया सुरू केल्या. ह्या इमारतींतल्या भाडेकरूंक जागा रिती करपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
