भांगरभूंय | प्रतिनिधी
भांगरभूंय । प्रतिनिधी
पोरणे गोंयः काँग्रेस फुडारी राजीव गांधी हाका खासदार म्हणून अपात्र थाराययल्ल्याचो तिसवाडी काँग्रेस गट समिती वतीन मेरशी कडेन संकल्प सत्याग्रहांत निशेध केलो. राहुल गांधी म्हारगाय, बेरोजगारी आनी साबार मनश्यांक भेश्टायतात त्या प्रश्नांक वाचा फोडटा म्हणून भियेल्ल्या भाजपान ताका खासदार म्हणून अपात्र थारायलां अशें प्रदेश काँग्रेस अध्यक्ष अमित पाटकारान ह्या वेळार सांगलें.
मोदी आनी उद्देजक गौतम अदानी हांच्या मदल्या संबंदां विशीं राहुल गांधीन प्रश्न विचारपाक सुरवात केल्ली तेन्नाच्यान ताका खासदार म्हणून अपात्र थारावपाच्या कटाक सुरवात जाल्ली. अदानीच्या कोळश्याची येरादारी करपा खातीर गोंयांत लोकांचो विरोध आसून लेगीत रेल्वे मार्गाचें दुपदरीकरण करपाचें काम चल्लां.. गोंयच्या भाजपा सरकाराक साबार लोकांची मातून हित राखण करपाची ना. अदानीक लागून हें सरकार कितेंय करपाक तयार आसा अशें तांणी फुडें सांगलें. 2024चे लोकसभा वेंचणुकेंत भाजपा सरकाराक भायर मारपाचो उलो तांणे मारलो.
काँग्रेस फुडारी एल्वीस गोम्स, कॅप्टन व्हिरियातो फर्नांडीस, सान्ताक्रुज गट काँग्रेस अध्यक्ष जॉन नाझारेथ, कुमारजुवें गट काँग्रेस अध्यश्र विशाल वळवयकार, सान्तआंद्रे गट काँग्रेस अध्यक्ष मनोज पालकार, बायल काँग्रेस अध्यक्ष बीना नायक, प्रदेश काँग्रेस सरचिटणीस वरद म्हार्दोळकार. युवक काँग्रेस अध्यक्ष जॉएल आंद्राद हांणी संकल्प सत्याग्रहांत वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
