भांगरभूंय | प्रतिनिधी
लो कसभे खातीर फुडल्या चार म्हयन्यांत जावपी रणसंग्रामाची रंगीत तालीम म्हणून जाचे कडेन पळयतात त्या पांच राज्यांतल्या विधानसभा वेंचणुकांत तेलंगणा सोडल्यार हेर चारूय राज्यांत मतदानाची प्रक्रिया पुराय जाल्या. तेलंगणांत बिरेस्तारा मतदान जातलें. ते उपरांत तीन दिसांनी मतपेटयो उलोवपाक लागतल्यो. भाजपा, काँग्रेस सयत हेर राजकी पक्षांक लेगीत मतदारांनी तांच्या पदरांत कितें उडयलां हें कळटलें. आतां हे लडायेंत भाजपा आनी काँग्रेस ह्या दोन मुखेल पक्षां मदींच लडत आसा. लोकसभेच्या येता त्या वेंचणुकांचो विचार केल्यार तांचे कामगिरी कडेनूच देशवासीयांचें लक्ष लागून रावप सभावीक. लोकसभे खातीरचीं राजकी समिकरणां 3 डिसेंबराक ह्या पांचूय राज्यांतल्या वेंचणुकांचो निकाल लागले उपरांत खऱ्या अर्थान मांडप जातलें. मध्यप्रदेश आनी राजस्थान ह्या दोन राज्यांतल्या वेंचणूक निकाला कडेन भाजपा आनी काँग्रेसाचें लक्ष चड करून लागून आसतलें. तरी काँग्रेस पक्षाच्या एका फुडाऱ्याक अनामीक भिरांतीन सध्या पछाडल्या. आनी ती म्हणल्यार वेंचणूक प्रचारा मजगतीं राहुल गांधी हांणी तांचे आतां मेरेनचे संवकळी प्रमाण भाजपाक एका म्हत्वाच्या खिणाक घाल्ल्या एका फुलटॉसाक लागून एकूण चित्रूच बदलपाचो धोको तयार जाला. भाजपाक हाचे पयलीं गुजरात सावन हेर कांय राज्यांतूय राहुल आसूं वा सोनिया, मल्लिकार्जुन खर्गे वा दिग्विजय सिंह, तांणी अशें फुलटॉस घालून मजतूच केल्या. ताका लागून राजस्थानांत राहुल गांधी हाणें ताचे मदली अपरिपक्व राजकारणाची नव्यान झलक दाखयत केल्लीं विधानां काँग्रेस खातीर कितलीं म्हारग थारपाक शकतात हें आतां वेंचणूक निकाला उपरांत कळटलें. निकाल जाहीर जाय मेरेन निदान काँग्रेस फुडाऱ्यांक ताची रुखरुख लागून आसतली.
संवसारीक पांवड्यार आपल्या नेतृत्व गुणांनी स्वताची अशी एक वेगळीच सुवात तयार करपी नरेंद्र मोदी हांची संभावना ‘पनवती’ अशी करून राहुल गांधी हाणें सदचे भशेन म्हत्वाच्या खिणाक घाल्ल्या फुलटॉसाचेर भाजपान व्हडलो सको हुबोवपाची संद सोडल्ली जाल्यार तें एक अजाप थारपाचें. राहुलान हें विधान केले उपरांत भाजपाच्या फुडाऱ्यांनी ताचेर असो हल्लो केलो कीं ताचो परिणाम मतदारांचेर जावपाची शक्यताय काँग्रेस लेगीत सध्या न्हयकारीना. मात स्वता राहुलान हें विधान केल्ल्यान काँग्रेस फुडाऱ्यांची अवस्था सांगपाक येना आनी सोंसपाकूय जायना अशीच जाल्या. राहुलाची जीब निसरिल्ल्यान हाच्या पयलींच काँग्रेसीची पुराय फजिती जाल्ली. हे खेपेक ताची पुनरावृत्ती जावपाक शकता हाची पक्षाच्या फुडाऱ्यांक पुराय खबर आसा. भाजपाच्या हातांत राहुल गांधीन कोलीतूच दिलां, अशेंय जायत्या जाणाक दिसता. आनी प्रधानमंत्री नरेंद्र मोदी हांचो असो अपमान जावचो हें मतदारांक आवडपाचो प्रश्नूच येना. अशा वेळार राजस्थानांत पयलींच अशोक गेहलोत हांचें व्हडें बुडपाच्या मार्गार आसतना हें विधान केल्ल्यान हें व्हडें सुरक्षीत रावपाची शक्यताय राजकी निरीक्षकांक कमीच दिसता. संवसारीक करंड क्रिकेट सर्तींत भारताक फायनलींत हार खावची पडली. ताचें भांडवल करून काँग्रेस फुडाऱ्यांनी ताचे वयल्यान अनैतीक म्हणपाक जाता अशा राजकारणांची संवसारीक सर्त खेळची हें कोणाकूय आवडपाचो प्रश्नूच नाशिल्लो. ताका लागून ‘पनवती’ कोण आनी ती कोणाक नडटली हाची जाप घडये ३ डिसेंबराक मेळपाक शकतली.
काँग्रेस आसू वा हेर विरोधी पक्षां कडेन भाजपा विरोधांत म्हत्वाचें अशे मुद्दे उणे आसात, अशें ना. पूण दर फावट विरोधकां कडल्यान भिरांकूळ अशी घोडचूक जाता आनी ताचो फायदो जावपाचे सुवातेर काँग्रेसीचेर ताचें बूमरँग जाल्ल्याचो इतिहास ताजो आसतनाय राहुल आसू वा हेर फुडाऱ्यांनी जिबेक मात्सो लगाम घाल्लो जाल्यार तांची आयज मात्शी वेगळी स्थिती दिसताशिल्ली अशें म्हणपाक बरीच सुवात आसा. नरेंद्र मोदी अहमदाबादांत वर्ल्ड कप फायनलीक हाजीर रावंक नाशिल्ले जाल्यार भारतीय पंगड संवसारीक वस्ताद थारताशिल्लो आनी मोदी भारतीय पंगडा खातीर पनवत थारले ह्या राहुलाच्या विधानाचेर पुराय क्रिकेट विश्व सध्या हांसता, पूण राहुलाक ताचें कितेंच पडून गेलां अशें दिसना. हें हासपा सारकें विधान कमी म्हणून काय नकळो थंय बंगालांत ममता दिदीनूय तोच सूर लावन प्रधानमंत्री ‘पापी’आसात अशें म्हणत फायनल कोलकाताच्या ईडन गार्डनाचेर जाल्ली जाल्यार भारतीय पंगड वस्ताद थारताशिल्लो अशें विधान केलां. हो आनीक एक फुलटॉस ! ताचेर लेगीत भाजपान चौके- सके मारपाची संद वगडायली ना. आतां ममता दिदी 1996 तल्या संवसारीक करंड सर्तीच्या वेळार ईडन गार्डन स्टेडियमाचेर भारतीय पंगडाची उपांत्य मॅचींत श्रीलंके कडल्यान जाल्ल्या हलाखीचे परिस्थितीची जाणीव जाल्ली जाल्यार ती हें विधान करनाशिल्ली. राजकारण वेगळें आसा आनी खेळाच्या मैदानार जें घडटा ताचो असो सांगड घालपाक गेलें की हांशें हें जातलेंच. फकत मोदी दुस्वास हेच ह्या वक्तव्यां फाटलें कारण.
राहुल आनी ममता हांणी मोदी आड केल्ल्या अतर्क्य विधानां उपरांत अर्थातूच इंदिरा गांधी सावन जायत्या जाणांक ह्या वादांत आडकुवपाचो जे यत्न जाले ते सारके म्हणपाक येवचें ना तरी आपल्या प्रधानमंत्र्याक कोणेय ‘पनवत’ म्हणून अपमान करप हें कोणाकूच पटचें ना. राहुल गांधी हाका काँग्रेस पक्ष प्रधानमंत्री पदाचो उमेदवार मानून प्रचाराचेर नेट दिता. तेन्ना राहुल गांधीन अशी घोडचूक करपाक जायनाशिल्ली. त्याच वेळार ताचेर पड्डो घाल्लो जाल्यार बरेंच कितें साध्य लेगीत जाताशिल्लें. पूण तशें जावंक ना आनी तापिल्लें राजकी वातावरण अजूनय तापिल्लेंच आसा. नरेंद्र मोदी हांची ‘खिसेकापू’ अशी संभावनाय राहुल गांधीन केल्ल्यान काँग्रेसाचे आयचे हलाखीचे अवस्थेक कारण थारिल्ले नरेंद्र मोदी हे राहुलाक ताचे खातीर पनवती दिसले तर तातूंत अजाप दिसपा सारकें किदें आसा, असो उरफाटो प्रचार भाजपा वतीन जाता. वेंचणूक आयोगा कडेनूय कागाळ दाखल जाल्या. वेंचणूक प्रचाराची दिका हालीं तेंपार कशी बदलत गेल्या हाची जाप ह्या पांच राज्यांतल्या प्रचाराचो अभ्यास केल्यार निश्चितूच मेळटा. वेंचणूक प्रचाराचो पांवडो इतलो निसरत गेला कीं केंद्रीय वेंचणूक आयोगाकूय ताची गंभीर दखल घेवन खर पावलां उखलचीं पडटलीं. आयोगा कडेन सध्या कागाळींचो जो पावस पडपाक लागला तें पळयल्यार आमी खंय भरकटत वतात हाचो विचार करपाक मेळटलो. 2018 चे तुळेंत अंदुं आयोगा कडेन आयिल्ल्या कागाळींचो आंकडो चार हजारां वयल्यान इकरा हजारांचेर पावला हें किद्याचें लक्षण? हें सगळें आडावपाची जापसालदारी जोडपणान उखलची पडटली. प्रधानमंत्रीपदाची अप्रतिश्ठा करून वेंचणुको जिखपाक येतात काय कितें, हाची जाप घडये ३ डिसेंबराक मेळपाक शकतली.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
